Dúrbeleń kezeńde 130-daı ult pen ulysqa pana bolyp, tórinen oryn bergen qazaq halqynyń jaqsylyǵyn umytý múmkin emes!
Men 30-jyldary Qara teńizdiń soltústik-shyǵys jaǵalaýynda ómir súrgen grekterdiń urpaǵymyn. Qazir jasym 76-da. Sol bir solaqaı saıasattyń kesirinen Qazaqstanǵa jer aýdarylǵan jandardyń qatarynda meniń atam da bolǵan.
Jantúrshigerlik estelikterin aıtqanda, júregimiz eziletin. «Dalada qalyp, isherge asymyz bolmaǵan kezde qar sýymen júrek jalǵadyq. Esh jazyǵymyz bolmastan jaqyndarymyzdan aıyryldyq. Týǵan jerden qýyldyq... Sondaǵy qazaqtardyń bizge jasaǵan qamqorlyǵyn dál bizdeı eshkim sezine almas.
Qazaq bizdi synaqta syndyrmaǵan halyq! Qıyn kezde qyryn qaramaı, týǵanyndaı baýyryna basqan meıirban halyq!» degen atamnyń sózderi áli qulaǵymda saırap tur. Kózi tirisinde «qazaqtyń jaqsylyǵyn umytpańdar» dep otyrýshy edi.
Oılap otyrsam, eger qazaq halqynyń qamqorlyǵyn kórmegende bálkim, búgingideı ómir súrmes pe edik... Osy jerde ónip-ósip, órken jaıdyq. Bizdiń túrimiz bólek bolǵanymen, tilegimiz bir. Balalarym men nemerelerime tarıhymyz jaıynda aıtyp otyrýdy babalarymnyń amanaty dep sanaımyn. Bizdiń kórshilerimiz qazaqtar. Qannan berilgen qasıet shyǵar, qolynan kelse demep jiberýge daıar turatyn qarapaıym jandar. Keıde emhanaǵa, dúkenge baratyn sharýalarym bolsa, qarsy kelmesten kómektesedi. Qazaqtyń «kórshiń jaqsy bolsa, uıqyń tynysh» degen sózi osyndaıda aıtylatyn shyǵar. Jattap alǵanmyn. Mine, sol tynyshtyq meniń shańyraǵymda da bar. Olardy men de óz balalarymdaı qabyldaımyn. Qolymnan kelgenshe barymmen bólisip júremin. Men búgin ótkenge taǵzym ete otyryp, qazaq halqyna jer aýdarý kezinde kórsetken kómegi úshin rahmet aıtamyn. Meıirimdiliktiń, dostyqtyń jarqyn úlgisine aınalǵan Alǵys aıtý kúnimen barsha qazaqstandyqtardy quttyqtaımyn! Qazaq eliniń jaqsylyǵy eshqashan umytylmaıdy! Myń alǵys Sizderge!