Elordada Týrızm jáne sport mınıstrliginiń alqa otyrysy ótti. Oǵan QR Premer-Mınıstriniń orynbasary Tamara Dúısenova, Parlament depýtattary, salalyq vedomstvo basshylary men sarapshylar qatysty, dep habarlaıdy almaty-akshamy.kz
Týrızm jáne sport mınıstri Ermek Marjyqpaev ótken jyldyń nátıjeleri men bıyl atqarylatyn sharýalar jospary týraly aıtyp berdi. Ol elde sportpen shuǵyldanatyndar qatary turaqty túrde ósip jatqanyn atap ótti: 2023 jyly olardyń sany 510 myń adamǵa kóbeıgen. Alaıda salada nazar aýdararlyq máseleler de bar. Salany damytý úshin jańa kózqaras kerek. Ásirese buqaralyq sportty dáripteýge qatysty. Óńirler búdjetten bóletin qarajat kóleminiń jetkiliksiz ekeni aıtyldy.
«Halyqaralyq tájirıbege saı buqaralyq sportty damytý úshin mektepterden bastap, egde jastaǵylarǵa deıin arnaıy sporttyq lıgalardy jandandyrý kerek. Ozyq elderdiń tájirıbesi balalar arasyndaǵy buqaralyq sport bolashaq chempıondardyń negizi ekenin kórsetedi. Bizde ázirge biryńǵaı júıe joq. Demek buqaralyq sportty damytýdyń alǵashqy kezeńinen-aq aqsap turmyz», — dep atap ótti Tamara Dúısenova.
Osy oraıda mınıstrlik pen oblys ákimderine barlyq kezeńdegi sporttyq lıgalardy maqsatty túrde damytý jumystaryn qolǵa alý tapsyryldy. Bul iske salalyq mınıstrlikter, mektepter, kolejder, joǵary oqý oryndary, medısınalyq ortalyqtar men eńbek ujymdary at salysýy shart.
Vıse-premer balalar men jas óspirimder sport mektepterin qarjylandyrý týrasynda da sóz qozǵady. Bul baǵytta jalpy bilim berý oshaqtary sekildi jan basyna shaqqandaǵy normatıvterdi engizý jaǵyn qarastyrý qajettigi aıtyldy. Odan bólek 18 jasqa deıingi balalarǵa arnalǵan sporttyq úıirmelerge «vaýcherler» usyný júıesin retke keltirý maqsaty tur. Qarastyrylǵan qarajatty tıimdi jumsaý úshin «bir bala – bir vaýcher» prınsıpin qoldaný kózdelgen.
Joǵary jetistikter sportyn qarjylandyrý modeli de qaıta qarastyrýdy qajet etedi.
«Ulttyq qurama komandalaryna rezerv daıyndaıtyn sporttyq uıymdarymyz qazir olımpıadalyq emes sport túrlerine baǵyt alǵanyn moıyndaýymyz kerek. Bizde jazǵy olımpıadalyq oıyndar tizimine engen 45 túrli sportqa basymdyq berilgen. Olardyń qataryn azaıtyp, qalǵanyn damytýǵa mán berýmiz kerek. Bul tusta tańdaý ǵylymı turǵyda negizdelip, elimizdiń ereksheligin eskerýi qajet», — dep atap ótti vıse-premer.