Qurylysty 2019 jyly ákimdik qabyldap alǵan.
Mektep bar, biraq sabaq ótpeıdi. Talǵar aýdanyna qarasty Dáýlet aýylynda oqýshylar 3 jyldan beri onlaın oqýǵa májbúr, dep habarlaıdy Almaty-akshamy.kz Almaty.tv-ge silteme jasap.
Qurylysty 2019 jyly ákimdik qabyldap alǵan. O basta tapsyrys berýshi de - osy memlekettik mekeme. 1,6 mlrd teńgege kelisim jasasqan bólimnen máseleniń aq-qarasyn ajyratyp suraǵan edik, bas maman istiń basy-qasynda bolmaǵanyn aıtty. Ákim de, orynbasarlary da ornynda joq.
Daýdyń basy - Dáýlettegi mekteptiń sapasy. 2017 jyldyń jeltoqsanynda bastalǵan qurylys araǵa 2 jyl salyp qoldanysqa beriledi. Alǵashynda karantınge, keıinnen 2 ret kúrdeli jóndeýge jabylyp, oqýshylar onlaın oqýǵa kóshken.
«Onlaın sabaqty ata-analardyń bári qalamaıdy. Meniń 2 ulym bar, ekeýi de onlaın oqıdy. Onlaın sabaqta balanyń bilimi óte tómen. Tómen emes, óte tómen», – dedi Dáýlet aýylynyń turǵyny Saltanat Otarbaeva.
«Nemerem 1 synyptan bastap onlaında oqydy. Mine, qazir 3 synyp. Úsh jyl boldy jóndeý jumysy júrip jatqanyna. Osy mektepke 1 mlrd 600 myń aqsha bóldi, ol qaıda ketti?» – dedi Dáýlet aýylynyń turǵyny Ásem Atageldıeva.
2020 jyly qańtarda-aq jer astyndaǵy sýdyń deńgeıi kóterilip, mekteptiń qabyrǵasy men edeni otyra bastaǵan. Qurylysshylar negizi sebep ǵımarat shógindi aýmaqqa turǵandyǵyn aıtty. Eden kemi 60 smge shókken, ony bıiktetý úshin árkim kelip úsh qabat sement tósepti. Al armatýra múldem salynbaǵan. Ǵımarattyń alǵashqy qabatyn qaıta buzǵan jumysshylar jalaqyǵa jete almaı júr. «Bizge 1,5 mln qaryz. 15 adam bir apta boldy jumysty toqtattyq. «Aqshany áne beremiz, mine beremiz» dep soza beredi», – dedi jaldamaly jumysshy Ǵabıt Amırov.
Jumysshylar men qurylystyń jaıyna tikeleı jaýapty mamandar jaýap berýden jaltardy. Al oqýshylar dástúrli formatqa tek saraptama nátıjesi shyqqan soń aýysa alady.
«Qubyr tartylyp, tolyǵymen aıaqtalady. Osy aıdyń sońyn kútip otyrmyz. Sol aıaqtalǵannan keıin balalardy oflaın oqytý máselesin qarastyramyz», – dedi Talǵar aýdandyq bilim bóliminiń basshysy Aınakúl Úshkempirova.
«Osy jumysqa salǵyrt qaraǵany úshin Almaty oblysy ákimdigi tarapynan sáýlet jáne qurylysty baqylaý basqarmasynyń basshysyna qatysty qyzmettik tekserý júrgizilip jatyr. Almaty oblysynyń ákimi Marat Sultanǵazıev oblys prokýroryna jumysqa tikeleı tekserý júrgizýdi suraǵan bolatyn», – dedi Almaty oblysy ákimi baspasóz qyzmetiniń basshysy Ǵalymurat Júkel.
Másele jýyq arada sheshilmese, turǵyndar tym quryǵanda eski mektepke qaıtarýdy suraıdy. Biraq onyń da bútini bólinip, jartysy jarylǵan. Al jóndeýi jónge kelmegen mektep áli de apatty jaǵdaıda dep tanylmaı tur.