İs fıgýranttary Ádilet Oraz ben Ázimjan Saıdbaev áli izdestirilip jatyr.
Almaty prokýratýrasy "qarjy pıramıdasyn qurdy jáne ony basqardy" dep aıyptalǵan vaınerlerdiń isi Almaly aýdandyq sotyna joldandy, dep habarlaıdy Almaty-akshamy.kz.
"Almaty qalasynyń prokýratýrasy uıymdasqan qylmystyq top quramynda qarjy (ınvestısıalyq) pıramıdasyn qurý jáne ony basqarý faktisi boıynsha qylmystyq isti Almaty qalasynyń Almaly aýdandyq sotyna A. Qurmanǵalıev, R. Býrkanov, D. Rahımova, D.Cha, A. Rústemov, T. Kasenov, S. Kasenov, N. Sultanbaev, M. Shernıazov, M. Týrebaev, B. Jarmuhamed, Erlan jáne Erjan Mansýrovtardy aıyptaý boıynsha qylmystyq isti sotqa joldady", - dep habarlady Almaty prokýratýrasy.
Sonymen birge is fıgýranttary Ádilet Oraz ben Ázimjan Saıdbaev áli izdestirilip jatqany, olarǵa halyqaralyq izdeý jarıalanǵany habarlandy.
Qylmystyq is aıasynda 41 jyljymaıtyn múlikke, 3 avtokólikke, 9 banktik shotqa jáne 16 kompanıanyń jarǵylyq kapıtalyndaǵy ártúrli úlesterge tyıym salynǵan. İs boıynsha aıyptaýdy prosesýaldy prokýror qoldaıdy.
Eske salaıyq, 2022 jylǵy 10 aqpanynda vaınerler Meıirjan Tórebaev pen Meıirhan Shernıazovqa qatysty "Qarjy (ınvestısıa) pıramıdasyn qurý jáne basqarý" baby boıynsha qylmystyq is qozǵaldy. Olardy qamaýda ustaý merzimi birneshe ret uzartyldy. Keıingi ret 21 qarashada taǵy bir aıǵa, 19 jeltoqsanǵa deıin qamaýda ustalatyny habarlanǵan edi.