Investorǵa qoıylatyn basty talap – jobanyń nátıjeligi
Aýyl sharýashylyǵy salalary boıynsha memlekettik sýbsıdıa berýde qosymsha mindetter júkteledi. Bul týraly QR Aýyl sharýashylyǵy mınıstri Erbol Qarashókeev málim etti, dep habarlaıdy Almaty-akshamy.kz QazAqparatqa silteme jasap.
«Sýbsıdıany tıimdi ete túsýdegi taǵy bir jańashyldyq - qosymsha mindetter engizý. Talaptarǵa kelsek, sýbsıdıa alatyn aýyl sharýashylyǵy ónimin óndirýshiler ishki naryq suranysyn esepke ala otyryp baǵa turaqtylyǵyn saqtaýy tıis. Bul másele boıynsha qazir Saýda jáne ıntegrasıa mınıstrligimen birlesken jumys júrip jatyr. Sonymen qatar jumysshylardyń jalaqysyn ortasha deńgeıden túsirýge jol bermeýdi kózdeımiz. Sol sıaqty 5 jylda bir ret ınvestısıa quıý mindeti talap etilmek», - dedi Erbol Qarashókeev Májiliste ótken dóńgelek ústel barysynda.
Sondaı-aq, mınıstr aýyl sharýashylyǵy salasynda ınvestjobalarǵa jeńildik bolatynyn aıtty.
«Investorǵa qoıylatyn basty talap – jobanyń nátıjeligi. Osy oraıda biz ınvestısıalyq jobalarǵa sýbsıdıanyń 75 paıyzyn birden bermekpiz. Qalǵan 25 paıyzy joba nátıje ákelgen soń óteledi», - deıdi ol.
Buǵan deıin Erbol Qarashókeev sýbsıdıalaý prosesiniń elektrondy formatqa kóshetinin aıtqan edi.
Atalǵan jıynda QR Parlamenti Májilisiniń depýtaty, agrarlyq máseleler komıtetiniń múshesi Asqarbek Úısimbaev otandyq sút óndirisiniń damýyna alańdaýshylyq bildirdi.
Onyń aıtýynsha, Qazaqstanda 3 mln tonna sút ónimderiniń tapshylyǵy bar.