Aýdannyń barlyq saılaý komısıasy mańyzdy naýqanǵa daıyn.
14 shilde kúni Qazaqstanda aýdandyq mańyzy bar qalalardyń, kentter men aýyl ákimderiniń saılaýaldy úgit-nasıhat jumystary bastalady, dep habarlaıdy Almaty-akshamy.kz Almaty.tv saıtyna silteme jasap.
Dál qazir óńirlerde naýqanǵa daıyndyq qyzý júrip jatyr. Belgili bolǵandaı, Almaty oblysynyń Talǵar aýdanynyń ózinde birden 4 aýyldyq okrýgtiń ákimi aýysady.
«Otbasymyz jáne týys-baýyrlarymyzben baryp, óz daýysymyzdy beremiz. Tańdaýymyzdy jasaımyz», – dedi Besaǵash aýylynyń turǵyny Gúljamal Tasanova.
Almaty oblysy Talǵar aýdanyna qarasty Besaǵash aýyldyq okrýginiń turǵyndary 25 shildede ótetin saılaý kúni mindetti túrde daýys berýge keletinderin aıtty. Sebebi saılaý nátıjesi jalpy bir aýyldyń taǵdyryna áser etedi, sondyqtan bul naýqannyń olar úshin mańyzy zor bolmaq.
«25 shilde aýyldyq ákimderdiń saılaýy bolǵaly jatyr. Aýyl turǵynyn saılaǵymyz keledi. Ózimiz otbasymyzben kelip, saılaýǵa qatysamyz. Aýylǵa kómektesedi dep úmittenemiz, tańdaǵan kandıdatymyzǵa daýys beremiz», – dedi Besaǵash aýylynyń turǵyny Zeınehan Nazekenova.
Talǵar aýdanynda resmı túrde tirkelgen koronavırýstyń úndi shtammyna baılanysty, saqtyq sharalary qatań saqtalady. Saılaý oryndarynda juqpaly indettiń aldyn alý maqsatynda kireberiske bakterısıdtik týnel qoıylyp, termometr men antıseptıkter qoldanylady. Al daýys berýshiler úshin medısınalyq betperdeler men arnaıy qolǵaptar da daıyn.
«Búginde aýdannyń barlyq saılaý komısıasy óz jumysyna daıyn. Tehnıka men materıal jaǵynan tolyq qamtylǵan. Kanselárlyq taýarlar syndy shyǵyndar úshin qosymsha kómek bolady», – dedi Talǵar aýdandyq saılaý komısıasynyń tóraǵasy Muhıt Dúısebaev.
Talǵar aýdany boıynsha ákim laýazymyna tórt aýyldyq okrýgten ózin 36 adam usynǵan. Al aýyl halqy óz tańdaýyn 23 saılaý ornynyń birinde jasaı alady. Búginde jalpy respýblıka boıynsha 2500-ge jýyq aýyldyq okrýg ákimi bar. Sońǵy málimetterge súıensek, jalpy úmitker sany 775 adamdy quraıdy.