Taldyqorǵanda sybaılas jemqorlyqqa qarsy mádenıetti qalyptastyrýǵa eleýli úles qosqan jýrnalıser marapattaldy, dep habarlaıdy aqshamnews.kz. Qoǵam dertiniń aldyn alý taqyrybyna qalam terbegen tilshilerdiń úzdik maqalalary men beınemazmundary sarapqa túsip, jeńimpazdarǵa syı-qurmet kórsetildi. Baıqaýdy uıymdastyrýǵa Jetisý oblystyq qoǵamdyq damý basqarmasy men «Jetisý jastar kongresi» qoǵamdyq birlestigi uıytqy boldy.
Baıqaýǵa bıyl 20 shaqty materıal usynylyp, olardyń ishinen ádil-qazylar alqasy altaýyn marapatqa laıyq dep tanydy. Ár jyl saıyn ótetin oblystyq baıqaýǵa jýrnalıser, blogerler men medıa qyzmetkerler belsendi qatysyp, sybaılas jemqorlyqpen kúres jáne onyń aldyn alý máselelerin kóterdi.
-
Almat Esembekov, Alakól aýdandyq gazetiniń bas redaktory, «Búlingennen búldirgi alma» atty maqalasymen «Internet-resýrstaǵy úzdik maqala» atalymyn jeńip aldy. Ol óziniń maqalasynda halyqty sybaılas jemqorlyqqa qarsy kúreske yntalandyrý men baǵyttaýdyń mańyzdylyǵyn atap ótti.
-
Muhtar Kúmisbek, «Egemen Qazaqstan» gazetiniń tilshisi, baıqaýdyń «Eń úzdik maqala» nomınasıasynda jeńiske jetti.
-
Murat Jumabaı, «Jetisý» teleradıokompanıasynyń redaktory, «Úzdik beınerolık» atalymynyń ıegeri boldy.
-
Qýanysh Qanatuly, «Qazaqstan» ulttyq arnasynyń tilshisi, «Áleýmettik jelilerdi qamtý» boıynsha marapattaldy.
-
Gúljan Tursynova, «Jetisu» gazetiniń tilshisi, «Úzdik jýrnalısik zertteý» atalymyna ıe boldy.
Saltanatty jıynda sybaılas jemqorlyqtyń aldyn alý men oǵan qarsy kúreske úles qosqan memlekettik qyzmetkerler de erekshe qurmetke bólendi.
Bul baıqaý sybaılas jemqorlyqqa qarsy kúrestiń mańyzdylyǵyn halyqqa túsindirý, jýrnalıserdiń qoǵam aldyndaǵy jaýapkershiligin arttyrý maqsatynda ótkizilýde. Jýrnalıserdiń aýqymdy ári mańyzdy máselelerdi kóterýi qoǵamda sybaılas jemqorlyqqa qarsy mádenıet qalyptastyrýǵa septigin tıgizedi.