19 jeltoqsan kúni Qazaq ulttyq qyzdar pedagogıkalyq ýnıversıtetinde «Otbasylyq zorlyq-zombylyqtyń aldyn alýdaǵy zamanaýı psıhologıalyq kózqarastar: teorıa jáne tájirıbe» atty halyqaralyq ǵylymı-tájirıbelik konferensıa ótti, dep habarlaıdy aqshamnews.kz
Konferensıaǵa zertteýshi ǵalymdar, kolejder men joǵary oqý oryndarynyń profesor-oqytýshylary, kolejder men bilim berý mekemeleriniń basshylary men mamandary, psıhologıalyq-pedagogıkalyq qoldaý ortalyqtarynyń qyzmetkerleri, doktoranttar, magıstranttar, stýdentter jáne jas ǵalymdar qatysty.
Mańyzy joǵary is-sharany QyzPU Basqarma Tóraǵasy — Rektory, Qazaqstan Respýblıkasy Prezıdentiniń janyndaǵy Áıelder isteri men otbasylyq-demografıalyq saıasat jónindegi Ulttyq komısıanyń múshesi Gúlmıra Qanaı ashty. Konferensıa taqyrybynyń ózektiligin aıta otyryp, rektor bıylǵy jyly 50 jyldyq mereıtoıyn atap ótetin psıhologıa kafedrasynyń osy is-sharany ýnıversıtet qabyrǵasynda ótkizýiniń erekshe mańyzy bar ekenin atap ótti.
Halyqaralyq ǵylymı-tájirıbelik konferensıada qazaqstandyq jáne sheteldik belgili psıhologtar, ǵalymdar, sarapshylar, memlekettik organdar men azamattyq qoǵam ókilderi qatysyp, otbasylyq zorlyq-zombylyqtyń ózekti máselelerin, onyń sebepteri men saldarlaryn, aldyn-alýdyń ádisterin talqylady.
«Búgingi kúni «Psıhologıa» — bizdiń qoǵam úshin asa mańyzdy jáne ózekti mamandyq. Ásirese bilikti mamandardy daıarlaý qazirgi ýaqytta erekshe mańyzǵa ıe. Ótken jyly «Amanat» partıasy halyqqa psıhologıalyq kómek kórsetýdiń tıimdi ınstıtýtyn qurý máselesine erekshe nazar aýdardy. Jyl boıy Qazaq ulttyq qyzdar pedagogıkalyq ýnıversıtetiniń psıhologıa kafedrasynyń qoldaýymen osy baǵytta belsendi jumys júrgizilip keledi. Al ýnıversıtet qabyrǵasynda ótip jatqan búgingi halyqaralyq ǵylymı-tájirıbelik konferensıaǵa Estonıa, Qyrǵyzstan jáne Túrkıadan kelgen spıkerler qatysýda. Bul mamandar bala tárbıesi men ata-analarmen jumys isteý salasynda tájirıbesi mol. Olar óz tájirıbelerimen bólisip, pikir almasýda. Konferensıaǵa stýdentter de qatysyp otyr. Bul is-shara stýdentter úshin paıdaly aqparatqa toly ári bolashaq mamandyqtarynda qoldanýǵa qajetti mańyzdy tájirıbe beredi», - dedi Qazaqstan Respýblıkasy Ulttyq ǵylym akademıasynyń akademıgi, profesor Zarema Shaýkenova Kaýkenovna.
Qazaq ulttyq qyzdar pedagogıkalyq ýnıversıtetiniń profesory, psıhologıa ǵylymdarynyń doktory Horlan Sherázdanova ýnıversıtettiń psıhologıa kafedrasynyń otbasy psıhologıasyn damytýǵa qosqan úlesi men tarıhyna toqtaldy.
«Men psıhologıa kafedrasynda qyzmet etip kele jatqanyma 45 jyl boldy. Osy kafedrada meniń búkil ómirim ótti. Psıhologıa mamandyǵy ýnıversıtettiń bilim berý júıesine 1997 jyly qosyldy. Sol ýaqyttan beri biz memleketimiz úshin joǵary bilikti psıholog mamandaryn daıarlaýdy bastadyq. Biz psıhologıa mamandarynyń óz kásibine degen súıispenshiligin arttyrýǵa, sondaı-aq elimiz úshin joǵary dárejeli mamandardy daıarlaýǵa óz úlesimizdi qostyq. Men psıhologıa kafedrasynyń 50 jyl ishinde úlken jetistikterge jetkenin erekshe atap ótkim keledi. Osy ýaqyt aralyǵynda bizdiń kafedra Qazaqstan Respýblıkasynda mańyzdy jumystar atqardy. Biz kóptegen memlekettik jobalarǵa qatysyp, olardy bilim berý júıesine engizdik. Bul jetistikter kafedranyń kásibı sheberligi men ujymdyq eńbeginiń nátıjesi dep bilemin», - dedi Horlan Sherázdanova Toktamysovna.
Bul shara otbasylyq zorlyq-zombylyq máselesin teorıalyq turǵydan talqylap, ony sheshýdiń zamanaýı ádisterin tájirıbelik deńgeıde qarastyrýǵa baǵyttaldy. Konferensıa halyqaralyq tájirıbe almasý men qaýipsiz orta qurýǵa, ózara qatynastardyń joǵary mádenı deńgeıi men psıhologıalyq aman-saýlyqty qalyptastyrýǵa baǵyttalǵan birlesken bastamalardy ázirleý úshin mańyzdy platforma boldy. Onyń qorytyndysynda — otbasylyq amandyqty nyǵaıtýǵa, daǵdarystyq jaǵdaılardyń aldyn alýǵa jáne sapaly psıhologıalyq kómek júıesin damytýǵa baǵyttalǵan usynystar aıtyldy.
