Mereıtoılyq shara Saltanat saraıynda ǵylymı-praktıkalyq konferensıamen jalǵasty
Búgin Taldyqorǵanda Jolbarys bıdiń týǵanyna 350 jyl tolýyna oraı eńseli eskertkishi ashyldy. Sol sıaqty ǵylymı-praktıkalyq konferensıa ótip, tarıhı tulǵanyń batyrlyǵyn, bı-sheshendigin, qolbasshylyǵyn keńinen tanytatyn qos kitaptyń tusaýy kesildi, - dep habarlaıdy Almaty-akshamy.kz Almaty oblysy ákiminiń baspasóz qyzmetine silteme jasap.
Saltanatty sharaǵa oblys ákimi Amandyq Batalov, Qazaqstan Prezıdentiniń kómekshisi Qanat Bozymbaev, «Jolbarys bı» qoǵamdyq qorynyń tóraǵasy Omarhan Óksikbaev, memleket jáne qoǵam qaıratkeri Amangeldi Shabdarbaev qatysty.
«Jolbarys bı» qoǵamdyq qorynyń qarjysyna turǵyzylǵan eskertkish Taldyqorǵan qalasynyń 6-shy shaǵyn aýdanynda Óner mektebiniń janyndaǵy ashyq alańǵa qoıyldy. Qurmetti qonaqtar eskertkishtiń lentasyn qıyp, jabýyn túsirgen soń, quttyqtaý tilekter aıtyldy.
Aldymen sóz alǵan oblys ákimi Amandyq Batalov Jetisý jeriniń batyrlar men aqyndardyń, bı-sheshenderdiń týǵan ólkesi ekenin atap ótti.
«Elbasy Nursultan Ábishuly Nazarbaevtyń sheshimimen Almaty oblysynyń ortalyǵy bolǵan Taldyqorǵannyń qazir ósip-órkendegen shaǵyna kýá bolyp otyrmyz. Oǵan da bıyl 20 jyl toldy. Oblystaǵy irgeli isterge Prezıdentimiz Qasym-Jomart Kemeluly Toqaev zor qoldaý kórsetýde. «Rýhanı jańǵyrý» baǵdarlamasy aıasynda bıyl Jambyl babamyzdyń 175, Muqaǵalı Maqataevtyń 90 jyldyǵyn ótkizdik, endi Jolbarys bıdiń 350 jyldyǵyn atap ótip otyrmyz. «Jolbarys bı» qorynyń azamattary bastama kóterip, eskertkishti daıyndatyp, músinshiler, qurylysshylar belsene kirisip, búgin, mine, el Táýelsizdiginiń 30 jyldyǵy qarsańynda Taldyqorǵannyń tórinde bı babamyzdyń eskertkishi qoıyldy. Bul – ósip kele jatqan urpaqtarymyzǵa úlgi, tárbıe. Eskertkish qutty bolsyn, baba rýhy bárimizdi qoldap-qorǵap júrsin, elimiz aman, zamanymyz tynysh bolsyn», - dedi A. Batalov.
Óz sózinde «Jolbarys bı» qoǵamdyq qorynyń tóraǵasy, qoǵam qaıratkeri Omarhan Óksikbaev eskertkishti ornatý úshin qorǵa qarjylaı qoldaý kórsetip, bir myńdaı azamat atsalysqanyn aıtty. Jáne eskertkishti ornatatyn ornyn belgilep bergen, rýhanı demeý bolǵan oblys, qala basshylyǵyna da rızashylyǵyn jetkizdi. Sol sıaqty úlken jumys tyndyrǵan sáýletshi, músinshi, qurylysshy mamandarǵa da alǵysyn bildirdi.
«Búgingi sharany halqyna saıa da, pana da bola bilgen batyr, bı, áýlıe Jolbarys babanyń rýhyn jańǵyrtý dep bilemin. Babanyń búkil 90 jyldyq ǵumyry eldikke, ádildikke degen súıispenshilikke toly boldy. Onyń osy ónegeli ómirin jas urpaqqa jetkize bilsek, onda babany ulyqtaýdaǵy maqsattyń oryndalǵany», - dedi Omarhan Óksikbaev.
Munan soń el Prezıdentiniń kómekshisi Qanat Bozymbaev, memleket jáne qoǵam qaıratkeri Amangeldi Shabdarbaev, Mádenıet jáne sport mınıstriniń keńesshisi Erlan Jurynbaev ta aıtýly sharanyń tarıhty tanýdaǵy, rýhanı jańǵyrýdaǵy róline toqtalyp, quttyqtaý tilekterin jetkizdi. Sonymen birge ánshi, sazger Aǵaısha Isaǵulova kópshilik úshin «Jolbarys babam» ánin oryndap berdi.
Mereıtoılyq shara Saltanat saraıynda ǵylymı-praktıkalyq konferensıamen jalǵasty. Jıynda aldymen Jolbarys baba jaıyndaǵy jazýshy, zertteýshi, jýrnalıs Talǵat Aıtbaıuly daıyndaǵan «Ańyzben jetken abyz», sol sıaqty «Jylqaıdaruly Jolbarys bı elinde» atty qos kitaptyń tusaýkeser rásimi jasalyp, oqyrmanǵa jol tartty.
Konferensıada qoǵam qaıratkerleri, zertteýshiler, tarıhshylar, atap aıtqanda, Parlamenti Senatynyń depýtaty Baqytjan Jumaǵulov, Almaty oblysynyń Qurmetti azamaty, qoǵam qaıratkeri Naýryz Qylyshbaev, D.A.Qonaev atyndaǵy Eýrazıalyq zań akademıasynyń rektory, Qadyrǵalı bı atyndaǵy qoǵamdyq qordyń prezıdenti, Qazaqstannyń Eńbek sińirgen qaıratkeri Ómiráli Jalaırı, tarıh ǵylymdarynyń doktory, profesor, QR UǴA akademıgi, Qazaqstan tarıhshylary qaýymdastyǵynyń tóraǵasy Mámbet Qoıgeldıev mazmundy baıandamalar jasap, tarıhı derekterge toqtaldy.
«Almaty oblysynda zertteýdi qajet etetin, halyq bolyp úlgi tutatyn tarıhı tulǵalar óte kóp. Solardyń qatarynda «Aqtaban shubyryndy – Alqakól sulama» kezeńinde batyrlyq, sheshendik bolmysy aıshyqtala túsken Jolbarys bıdiń orny erekshe. Babamen qatar onyń keıingi urpaqtarynyń da túrli tarıhı kezeńdegi ómiri zertteýge turarlyq. Kóp jaıttar halyq jadynda saqtala bermeıdi. Sondyqtan ony ańyz-shejireler, derekti qujattar negizinde jańǵyrtyp, qaıta túletý – bizdiń paryzymyz», - dedi Mámbet Qoıgeldıev.
Jalpy Jolbarys bıdiń 350 jyldyǵyna arnalǵan sharalar aıasynda Kórkemóner galereıasynda Qazaqstannyń eńbek sińirgen qaıratkeri, Qazaqstan Jýrnalıser, Sýretshiler odaǵynyń múshesi, jýrnalıs, sýretshi Januzaq Músápirdiń jeke kórmesi ótedi. Sol sıaqty B.Rımova atyndaǵy drama teatrynda «Amanat» spektakliniń premerasy bolady.
Atap ótsek, eskertkishtiń avtorlary – Marat Núsipov, Januzaq Músápir, Baýyrjan Jýaspaev. Tuǵyry granıtten, eskertkishi – qodadan. Jalpy bıiktigi – 10,10 m.