«Sábı bolǵym keledi» dep atalǵan konsertke birqatar óner maıtalmany jınaldy
Almatyda muzbalaq aqyn Muqaǵalı Maqataev pen aqyn, sazger Tursynǵazy Rahımovty eske alý keshi ótti, dep habarlaıdy Almaty-akshamy.kz Almaty.tv-ge silteme jasap.
Qos tarlannyń shyǵarmashylyǵyna arnalǵan konsertke birqatar óner maıtalmany jınaldy.
Sahnasy án men áýezge, syrly sazǵa bólengen «Alataý» dástúrli óner teatryndaǵy kesh kompozıtor Tursynǵazy Rahımovtyń 70 jyldyǵyna arnalǵan. Eske alý konsertin qalalyq Mádenıet basqarmasy, sondaı-aq Semeı qalasy ákimdigi qatar uıymdastyryp otyr.
«Búgingi konsert Tursynǵazy aǵamyzdyń ánderiniń shyǵý tarıhynyń hronologıasynan, ıaǵnı jas kúninen bastap shyǵarǵan ánderinen bastalady. Búgingi sharada aǵamyzdyń Semeıden kelgen ánshi shákirtteri óner kórsetedi», – dedi Semeı qalalyq Mádenıet jáne tilderdi damytý bóliminiń basshysy Nazerke Aqqojına.
Kóp qosyla shyrqaıtyn «Sábı bolǵym keledi» ániniń sazyn jazǵan Tursynǵazy Rahımov bolatyn. Bıyl 90 jyldyǵy atalyp ótip jatqan Muqaǵalı shyǵarmashylyǵyn keń dáriptegen kompozıtor aqıyq aqynnyń 35 óleńine án shyǵarǵanyn da aıta ketý kerek. Kompozıtorlyq qyryn Maqataev týyndysymen tanytqan ánshini eske alý keshi de teginnen tegin bulaı atalǵan joq.
«Búgingi kelgen jastardyń bári – onyń kózin kórgen, janynda júrip ánin úırengen shákirtteri. Qazaq halqy barda, Tursynǵazy aǵamyzdyń esimi máńgilik jasaı beredi», – deıdi QR eńbek sińirgen ártisi Ramazan Stamǵazıev.
Búgingi eske alý keshine elimizdiń birqatar óner maıtalmandary da qatysty. Eldiń júreginen oryn alǵan ánshi-kompozıtor artynan 100-ge tarta án-mura qaldyrdy.