Naýryzda barlyǵy 117 myń adam UBT tapsyrdy.
Onyń ishinde talapkerlerdiń 76,1 paıyzy qazaq tilinde, 23,8% paıyzy orys tilinde, 117 adam aǵylshyn tilinde testileýden ótti, dep habarlaıdy almaty-akshamy.kz Ulttyq testileý ortalyǵyna silteme jasap.
UBT bastalǵaly shekti baldy 75%-ǵa jýyq talapker jınady. Ortasha balǵa keletin bolsaq, ol 69 baldy qurady. Eń joǵary bal – 137. Jalpy, 118 talapker 130-dan joǵary bal jınady.
Testke qatysýshylardyń basym bóligi "Bıologıa-Hımıa" kombınasıalaryn tańdaǵan, atap aıtqanda, 19%-y tapsyrdy. "Matematıka-Fızıka" pánderin 17% tańdaǵan. Sondaı-aq, top-3 qataryna talapkerlerdiń 12% tańdaǵan "Matematıka-Informatıka" kombınasıasy kirdi. Eń az tańdalǵan kombınasıa – "Hımıa-Fızıka", ony 121 adam tapsyrǵan.
"2024 jylǵy qańtar UBT-synyń qorytyndysy boıynsha talapkerler "Oqý saýattylyǵy" pánin joǵary deńgeıde tapsyrdy. Ortasha eseppen, suraqtardyń 77%-yna durys jaýap berilgen. Al "Fızıkany" tapsyrǵan talapkerlerdiń tek 34% tapsyrmany durys oryndaǵan, olar úshin "Mehanıkalyq tolqyndar" taqyryby qıyn boldy. Osylaısha, UBT nátıjeleri boıynsha Ulttyq testileý ortalyǵy tek sandar emes, sonymen qatar taqyryptar boıynsha egjeı-tegjeıli taldaýdy da usynady", – delingen UTO habarlamasynda.
UBT ótkizý barysynda 127 ereje buzýshylyq anyqtalǵan. Onyń ishinde 71 talapker smartfon, shpargalka jáne basqa da tyıym salynǵan zattardy alyp ótý áreketi saldarynan test tapsyrý múmkindiginen aıyryldy. Testileý kezinde erejelerdi buzǵany úshin aýdıtorıadan 51 adam shyǵaryldy. Beınejazbalarǵa taldaý júrgizý nátıjesinde 5 adamnyń nátıjesi joıyldy. Bógde tulǵalar anyqtalǵan joq.