Batys Qazaqstan oblysynda joldy sý shaıyp ketýine baılanysty Qaratóbe, Terekti jáne Shyńǵyrlaý aýdanynda 10 eldi meken kólik baılanysynsyz qaldy jáne oblystyq mańyzy bar 5 jol jabyldy.
BQO polısıa departamentiniń baspasóz qyzmetinen málim etkenindeı, óńirde 63 joldy sý bassa, sonyń ishinde bireýi – respýblıkalyq, altaýy – oblystyq, 17-si – jergilikti mańyzy bar avtojoldar. Bul joldarda stasıonarlyq beketter ornatyldy, dep habarlaıdy almaty-akshamy.kz.
«Oblys boıynsha sý tasqynynan qorǵaý jumysyna 703 polısıa qyzmetkeri 97 qyzmettik tehnıkamen jumyldyryldy. Qazirgi ýaqytta polısıa qyzmetkerleri turǵyndardy qaýipsiz jerge kóshirýdi jalǵastyrýda. Aýyldarda 3 771 adam kóshirilse, sonyń 1 575-i evakýasıalyq beketke ornalastyrylyp, 2 192-si týysqandaryna jiberildi. Atalǵan beketterdi kúzetý jumystaryna 13 qyzmetker belgilendi. Evakýasıalanǵan 49 aýyl turǵynynan ýaqytsha saqtaýdaǵy 68 azamattyq qarý tárkilendi. Barlyq qarý polısıa bólimderinde kúzetilýde. Sondaı-aq adamdar kóshirilgen eldi mekenderde azamattardyń múlkin qorǵaýǵa 90 qyzmetker (16 tehnıka) atsalysýda. Sonyń nátıjesinde bótenniń múlkin urlaý, tonaý derekteri tirkelgen joq», dep habarlady vedomstvodan.
«QazAvtoJol» UK» AQ BQO fılıalynyń málimeti boıynsha tumanǵa baılanysty 1 sáýir kúni saǵat 21.45-ten bastap respýblıkalyq mańyzy bar Oral-Tasqala-RF shekarasy (4-104 km) jáne saǵat 22.45-ten bastap Oral-Býzýlýk-RF shekarasy (5-33 km) jolynda barlyq kólik túrleri úshin shekteý engizildi.
