Aq halatty adamdardyń eńbegi árqashan erekshe qurmet pen qurmetke ıe. Óıtkeni olardyń ıyǵynda naýqastyń ómiri úshin úlken jaýapkershilik bar. Dáriger mamandyǵy - eń asyl, adamgershilik jáne qajetti mamandyqtardyń biri. Olardyń qıyn jumysy, kásibıligi men bilimi arqyly mıllıondaǵan adamdardyń ómiri men taǵdyry qutqarylady. Medısına qyzmetkerleri - bul mereke nemese demalys kúnderine qaramastan 24/7 jumys isteıtin kúrdeli jáne asa jaýapty mamandyqtyń jarqyn ókilderi. Olar shuǵyl túrde jumysqa shaqyrylýy múmkin jáne táýliktiń kez kelgen ýaqytynda tósekten kóterilýi múmkin, olar úshin belgili jumys ýaqyty, arnaıy kestesi joq. Adam janynyń shıpagerleri únemi jumysqa erte kelip, kesh qaıtady. Tipti, jańa jyldy tósekke tańylǵan naýqastyń janynda qarsy alady. Beti aýlaq tótenshe jaǵdaılar, tabıǵı apattar, kez kelgen oqıǵalar kezinde olar aldyńǵy saptan tabylyp, emdik sharalaryn jasaıdy. Sondyqtan da qoǵamda olarǵa degen qurmet erek. Shynynda da, olardy naǵyz batyrlar dep moıyndaýǵa laıyq.
Solardyń biri, óz isiniń úzdigi, hırýrg – gınekolog, Almaty qalasynyń №7 Qalalyq klınıkalyq aýrýhanasynyń gınekologıa bólimshesiniń meńgerýshisi Ospanǵalıeva Sáýlesh Muhtarqyzy. Almaty qalasynyń №7 Qalalyq klınıkalyq aýrýhanasynda 20 jyldan beri taban aýdarmaı jumys istep kele jatqan Sáýlesh Muhtarqyzynyń jumys ótili 35 jyl.
Sáýlesh Ospanǵalıeva AMMI-di 1988 jyly "emdeý isi" mamandyǵy boıynsha bitirgen. Eńbek jolyn 1989 jyly Shyǵys Qazaqstan oblysy Tarbaǵataı aýylynyń aýdandyq aýrýhanasynda bastaaǵn. Onda 1997 jylǵa deıin akýsher-gınekolog bolyp qyzmet etti. Sodan keıin, ıaǵnı 2000 jyldan bastap Almaty qalasynyń №7 MKB-da dáriger-gınekolog retinde jumys istedi. Sodan beri talaı naýqastyń aıaǵynan turyp ketýine úlesin qosqan aq halatty abzal janǵa 2019 jyly oǵan "Akýsherlik jáne gınekologıa" mamandyǵy boıynsha joǵary biliktilik sanaty berildi.
Sáýlesh Ospangalıeva áıelderdiń reprodýktıvti densaýlyǵyna, gınekologıalyq manıpýlásıalardyń/operasıalardyń barlyq túrlerin jasady. Mysaly: laparoskopıalyq/laparotomıalyq adneksaldy operasıalar (kıstalar, analyq bezderdiń túzilýi, paraovarıaldy kıstalar, tútik geneziniń bedeýligi), konservatıvti mıomektomıalar, jatyrdyń ampýtasıasy, ekstrapsıasy (laparotomıalyq, laparoskopıalyq, qynaptyq), prolaps jáne qynaptyq plasıkalyq operasıalar áıelder prolapsy gısteroskopıalyq operasıalar, endometrıalyq gıperplazıa, jatyr jáne jatyr moıny kanalynyń polıpteri sıaqty operasıalardy jasap, mol tájirıbıe janaqtady.
Qoǵamda ana men bala ómirin saqtap qalý úshin bar jaǵdaı jasalýy tıis. Sondyqtan táýliktiń kez kelgen ýaqytynda aýrýhana qabyrǵasynan tabylyp, óte aýyr ota jasap, kóptegen ana men balanyń ómirin saqtap qaldy. Búgingi tańda joǵary deńgeıdegi maman jas dárigerler men stýdentterge tálimger bolyp, baı tájirıbıesimen bólisýde. Sondaı-aq, Sáýlesh Muhtarqyzy basqaratyn bólimshede jumys isteıtin 28 qyzmetkerge basshylyq etedi. Onyń beseýi bilikti dáriger bolsa, 14-i medbıke. Al qalǵan 9-y bólimsheniń tazalyǵyna jaýap beretin sanıtar. Táýliktiń qaı ýaqytynda bolmasyn bólimshe ishindegi tazalyq saqtalyp tursa, bilikti dárigerler naýqastardyń janyna jebeý bola bilýi aldymen osy basshylyqtyń eren eńbegi ekenin aıtqan jón.
Osyndaı adam janynyń arashasy bola bilgen bilikti maman Sáýlesh Muhtarqyzy "Densaýlyq saqtaý isiniń úzdigi" tósbelgisimen, QR DSM, qalalyq ákimdik, DSU jáne №7 MKB basshylyǵynyń alǵys hattarymen jáne Qurmet gramotalarymen marapattalǵan.