Onlaın platformalar arqyly (Iandeks Taksı, Iandeks GO jáne t.b.) jumys isteıtin taksıster úshin arnaıy salyq rejımi engiziledi.
Bul týraly Májilistegi Úkimet saǵatynda QR Áleýmettik kodeksiniń jobasyn tanystyrý kezinde QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy Almaty-akshamy.kz QazAqparatqa silteme jasap.
«Onlaın platformalar arqyly (Iandeks Taksı, Iandeks GO jáne t.b.) jumyspen qamtylǵan azamattar úshin arnaıy salyq rejımi engiziledi. Bul rette salyq agentteri rólinde onlaın platformalar operatorlaryn aıqyndaý usynylady. Olar osynda jumys isteıtin azamattar atynan tıisti tólemderdi júrgizedi», - dedi vedomstvo basshysy.
Sonymen qatar ol Áleýmettik kodeks jobasynda áleýmettik táýekelderden saqtandyrý jáne azamattardy zeınetaqymen qamsyzdandyrýǵa máselesi eskerilgenin aıtty.
«Bes áleýmettik táýekelden saqtandyrýdy kózdeıtin qoldanystaǵy saqtandyrý júıesi halyqaralyq standarttarǵa jáne naqty ekonomıkalyq jaǵdaılarǵa saı keletin júıe retinde saqtalady. Degenmen, onyń maqsatty mindeti ózgeriske ushyraıdy. Júıe tek áleýmettik tólemder tóleýge ǵana baǵyttalmaı, eń aldymen, ol azamattardy resmı túrde jumyspen qamtylýǵa yntalandyrýdy kózdeıtin bolady. Osy oraıda Salyq kodeksine shaǵyn bıznestiń jaldamaly jumyskerleri úshin biryńǵaı mindetti tólemdi engizýge qatysty ózgerister engiziledi. Olar úshin salyq júktemesi endigi jyly 33 paıyzdan 20 paıyzǵa deıin tómendeıtin bolady», - dedi T. Dúısenova.