Anglıa quramasynyń oıynshysy Rahım Sterlıń úıine ury túskendikten, eline qaıtyp ketti.
Brıtandyq Daily Telegraph jýrnalısi Mett Loý málim etkenindeı, Qatarda ulttyq qurama sapynda oınap júrgen fýtbolshy R.Sterlıńtiń Londondaǵy úıin ótken senbide urylar tonap ketken, dep habarlaıdy Almaty-akshamy.kz QazAqparatqa silteme jasap.
Óz týǵandarynyń aman ekenine kóz jetkizý úshin úsh kishkentaı balasy bar Rahım Ulybrıtanıaǵa oralýdy jón kórgen. Sol sebepti ol Anglıanyń 1/8 fınalda Senegalmen ótken oıynyna qatysa almady. Fýtbolshy Qatarǵa qaıtyp oralýy múmkin ekendigi jazylady. Ol ázirge álem chempıonatynda bir gol soqty.
Senegaldy 3:0 esebimen jeńgen Anglıa shırek fınalda 10 jeltoqsanda álem chempıony - Fransıamen kezdesedi.
Anglıa quramasynyń bas bapkeri Garet Saýtgeıt Rahım Sterlıńtiń eline ketkenin rastap, otbasy birinshi orynda turýy kerektigin, oıynshyny qoldaıtynyn jetkizdi.