Tájikstannyń mádenı kúnderin merekeleý aıasynda EXPO alańynda Tájikstannyń aýyl sharýashylyǵy, ónerkásip ónimderi, ulttyq qolóner buıymdary jáne ulttyq taǵamdarynyń kórme-jármeńkesi ótti.
Ol óz jumysyn ýaqytynan buryn aıaqtady. Sebebi jetkizilgen ónimder jyldam satylyp ketti, dep habarlaıdy Almaty-akshamy.kz QazAqparatqa silteme jasap.
Eki kún ishinde is-sharaǵa 100 myńnan astam adam qatysty.
Astanaǵa óz taýarlarymen Soǵdy oblysynyń 300-ge jýyq aýyl sharýashylyǵy óndirýshisi keldi.
Kórme-jármeńkede olar 1000 tonnadan astam ónim satty.
Elorda qonaqtary men turǵyndaryna jetkizilgen ónimderdiń alýan túri usynyldy.
Assortımentte jańa pisken kókónister, jemister jáne baqsha daqyldary sıaqty aýyl sharýashylyǵy taýarlary boldy.
Bal, táttiler, túrli sýsyndar da qoljetimdi boldy.
Jármeńkede qolóner buıymdary, tabıǵı materıaldardan jasalǵan kádesyılar, kıiz, toqyma, toqylǵan jáne soǵylǵan sándik buıymdar, sondaı-aq pyshaqtar men álemge áıgili tájik atlasy jáne t.b. bar.
Sondaı-aq kelýshilerge qysh jáne ustalardyń temirden soqqan týyndylary, aǵash óńdeý, kórkem keskindeme, toqý jáne basqa da erekshe tehnıkalardy qosa alǵanda, ulttyq erekshelikter kórsetildi.
Jármeńkedegi erekshe sátterdiń biri – arnaıy konsert uıymdastyrylyp, onda Tájikstan Respýblıkasynyń sheberleri ónerin pash etti.