Kúni keshe qurbym tórtinshi qyzyn bosandy. Kúıeýi «jýyp» otyryp, qyzara bórtip: «Mynaý taǵy da qyz týdy. Bul qatyn maǵan uldy qashan týyp beremin deıdi sonda!», – dep kijindi. Al meniń jylaǵym keldi...
Jomartpen otasqanyma segiz jyldan asyp barady. Aramyzdaǵy burynǵy sezimniń tek qolamtasy qalǵan sıaqty. Sony úrlep, laýlatyp jaǵar náreste de joq.
Bala kúnimnen súıek týberkýlezine shaldyqqanmyn. Dárigerler sábı súıýime úzildi-kesildi tyıym salǵan. Aǵzamdaǵy ózge dertter de ómirge múgedek urpaq ákelýime sebepshi bolýy múmkin deıdi.
Men Jomartty bir kórgennen unattym. Satýshy edim. Dúkenge nan alýǵa kirgen jigittiń kúlgen kezde marjandaı tisteri appaq bolyp túzile ketip, kózderi bir syzyq bolyp qalatyny súıkimdi kórindi. Ekeýmizdiń kóńilimiz tez jarasym tapty. Úılendik.
Jomart pen anasynyń aýyldaǵy úıin, bar malyn satyp, qaladan tirlik izdep kelgen betteri eken. Jaldamaly páterde turyp jatypty. Úılerin satqan qarajatpen burynǵy qordalanǵan qaryzdaryn jaýypty.
Jomart ózin dala tósinde qyzylsha terip júrip jalǵyz jetkizgen anasyn qatty qurmetteıtin. Meniń marqum sheshemnen qalǵan bir bólmeli páterim bar edi. Az ýaqyt óte kele sonda turaıyq dep sheshtik.
Birde enemniń: «Qashan bala kóteredi, ýaqyt ótip jatyr, osylaı júre beresińder me?!» degen sózderin qulaǵym shalyp qaldy. Endi birde: «Suraı almasań, ózim-aq suraıyn», – dep jatyr eken kúıeýime.
Ýaqyt óte syrym ashylǵanda: «Aınalaıyn, nemere súıgim keledi! Meıli, aýrý bala bolsa da týyp bershi, tek kótershi, qazir medısına damyǵan ǵoı, óltirmes, ózim baǵyp beremin!», – dedi enem jalynǵandaı bop. Ol kisini de túsinemin. Biraq óz densaýlyǵymnyń jaıy ózime belgili ǵoı.
Taǵy birde ulyna: «Sen sheshek osy áıelge nege baılanyp qaldyń, a?! Áli jassyń. Bala týatyn áıeldi ózim-aq taýyp bereıin», – degende, Jomartym ne aıtty deısiz be?! «Mama, sonda ekeýmiz qaıda baryp turamyz, basymyzda úı de joq, al moıynda ilýli turǵan qaryzdy qaıtpekpiz...», – dep kúmiljidi.
Sol sátte syrttan kirip kelip turǵan men esik kózine otyra kettim. Sómkem sýsyp qolymnan túsip ketkende, kúıeýim oqys dybystan júgirip kelgen bolatyn.
Osydan soń bir bólmedegi úsheýmizdiń tońteris ómirimiz bastaldy. Bar ermegimiz – teledıdar. Tipti, «Shanshar», «Nysananyń» ázilderine zorlana, áıteýir únsizdikti, kóńilsiz kúnderdi buzý úshin kúletinimiz bar.
Sola-a-aı meniń ómirim! Taǵdyryma ókpelimin. Úsh adam bir-birimizge jipsiz baılanyp osylaı ómir súrýdemiz. Qashanǵa deıin shydar ekenbiz?..
P.S.
Bul meniń bir jastaǵy qyzyma kútýshi bolǵan Múnıra degen kelinshektiń áńgimesi bolatyn. Al sol qyzym búginde 13-ke keldi. Ýaqyt ýysyńda turmaıdy, arada syrǵyp biraz jyl da ótip ketipti- aý. Biz basqa qalaǵa kóship kettik. Múnıranyń taǵdyrynan habarsyzbyn. Biraq jany jaraly kelinshekti umytqanym joq...