Ońtústik Koreıa respýblıkasyna jumys isteýge ketken otandastarymyzdyń shet eldegi hal-ahýaly qandaı? Shekarada qashyp, ustalǵan eki jigittiń oqıǵasy sol jaqta jumys istep júrgen basqa azamattarǵa qalaı áser etti? Koreıa elinde bes jyldan astam ýaqyt nápaqa taýyp júrgen qazaq qyzymen Massaget.kz tilshisi suhbattasqan.
Almaty qalasynyń týmasy Qydyrbaeva Sabına Kýdárovna 2018 jyly Koreı Respýblıkasyna jumys isteýge barǵan. Ol ýaqytta eshqandaı vıza talap etilmegenin aıtady.
«Men ózim 2018 jyly maýsymda Koreıaǵa keldim. Sol jyldary K-ETA tapsyrý (Koreıanyń saıahatqa elektrondy ruqsaty), arnaıy qujat jınaý bolmady. Tek beketten ótken kezde qujattarymdy tekserdi. Elde júrgende eshqandaı jumys izdegen joqpyn. Osy jaqta bizdi qazaq baýyrlarymyz kútip alyp, jumysqa ornalastyrdy» , - deıdi Sabına Qydyrbaeva.
Koreıadaǵy alǵashqy tabysym 500 myń teńge
Koreıanyń (Gwangju) Kvandjý qalasynda turatyn ol qazir kólik shyǵaratyn zaýytta qyzmet atqarady.
«Meniń eń birinshi jumysym tamaq ishetin oryndarda ydys-aıaq jýý boldy. Ol kezdegi tabysym aıyna 1 mıllıon 500 myń von ıaǵnı 500 myń teńge bolatyn. Keıinnen qonaqúıde jumys istedim. Sosyn til úırenip, zaýytqa jumysqa ornalastym. Qazir kólik shyǵaratyn zaýytta jaryqshamdar (fara – esk.) shyǵaramyz. Jumys ýaqyty tańǵy 08:00- den keshki 20:00- ge deıin. Túski jáne keshki úzilisti eseptegende 10,5 saǵat jumys isteımiz. Qazirgi aılyǵym 1 mıllıon teńgeden joǵary», - deıdi ol.
Jumysshylarǵa erekshe jaǵdaı jasalǵan
«Bul elde jumys berýshiler jol aqysymen, túski jáne keshki aspen qamtamasyz etedi. Al dámhana nemese qonaqúılerde jumys isteseńiz onda arnaıy páter beriledi. Jalǵa beriletin úıler, komýnaldyq qyzmetti qosqanda aıyna 134 myń teńge shyǵady», - deıdi Koreıadaǵy qazaq qyzy.
Bul jaǵdaı Koreıadaǵy qazaqtarǵa da áser etti
«Koreıada júrgen qazaqtardyń sany óte kóp. Biraq 80%-y osynda jumys úshin kelgen. Tipti otbasymen kelip, osy jerde vızaǵa tapsyryp, balalaryn koreı mektepterinde oqytyp júrgender bar. «Eki azamat beketten qashyp ketti», degen jańalyqtan soń koreı halqynyń bizge degen kózqarastary ózgerdi. Olarǵa jurt terrorıst retinde qaraıdy sondyqtan qazaq azamattaryn jumys ornynan shyǵaryp jibergender de boldy», - deıdi ol.
Elge qaıtpaýdyń basty sebebi – aqsha
«Qazaqstanda jalaqy 200-300 myń teńge odan kóp jumysshyǵa tólemeıdi. Biz myna jaqta jaqsy aılyq alamyz. Sol sebepti elge qaıtqymyz joq. Koreıa bizdi óziniń aılyǵy jáne qaýipsizdigimen baýrap aldy», - deıdi Sabına.
Ulttyq taǵamdy saǵynsaq, ózbek asqanasyna baramyz
Sońǵy bes jylyn ózge elde ótkizgen Sabına Kýdárovna eldi saǵynǵanyn aıtady. Degenmen týǵan jerge oralý áli josparynda joq.
Ulttyq asymyzdy saǵynsaq Ózbekstan azamattarynyń ashyp qoıǵan arnaıy tamaqtanatyn oryndaryna baramyz - deıdi ol.
Odan ózge Koreıadaǵy el azamattary mereke kúnderi bas qosyp, arnaıy kesh ótkizip turady eken.