Memleket basshysy Qasym-Jomart Toqaev 2025 jyldy «Jumysshy mamandyqtary jyly» dep jarıalady. Bul – el ekonomıkasyn nyǵaıtýdaǵy strategıalyq qadam. Bastama tehnıkalyq jáne kásiptik bilim berýdiń mańyzdylyǵyn arttyryp, jumysshy mamandyqtarynyń bedelin kóterýge baǵyttalǵan.
Búgingi tańda ekonomıkanyń barlyq salalarynda bilikti mamandarǵa suranys joǵary. Qurylys, ónerkásip, kólik, qyzmet kórsetý jáne basqa da salalarda kásibı sheberligi joǵary mamandar qajet. Sondyqtan tehnıkalyq jáne kásiptik bilim berý uıymdarynyń aldynda úlken mindetter tur.
«Almaty jolaýshylar kóligi jáne tehnologıalar koleji» – elimizdiń tehnıkalyq jáne kásiptik bilim berý júıesindegi bedeldi oqý oryndarynyń biri. Kolej 2013 jyly qurylyp, búgingi tańda eńbek naryǵynyń talaptaryna saı joǵary bilikti jumysshy mamandaryn daıarlaýmen aınalysyp keledi.
Kolejdiń basty maqsaty – bilim alýshylarǵa sapaly bilim berip qana qoımaı, olardyń kásibı daǵdylaryn damytý, bolashaq maman retinde qalyptasýyna jaǵdaı jasaý. Sondyqtan mundaǵy bilim berý úrdisi de jańa zaman talaptaryna saı júrgiziledi. Bilim alýshylar teorıalyq bilimdi tájirıbemen ushtastyryp, óndiristik tájirıbeden ótedi. Kolej naryqta suranysqa ıe jumysshy mamandyqtaryn daıarlaıdy. Máselen, shashtaraz óneri – sán ındýstrıasynda suranysqa ıe mamandyq. Bilim alýshylar munda shash qıý, boıaý, sándeý ádisterin meńgeredi. Sondaı-aq, elektr jabdyqtary mamandaryn daıarlaý baǵdary elektr qurylǵylaryn jóndeý, tehnıkalyq qyzmet kórsetý sıaqty daǵdylardy úıretedi. Tokar isi – metal óńdeý, ártúrli bólshekterdi daıyndaý boıynsha bilikti mamandardy daıarlasa, dánekerleý isi – óndiristiń barlyq salasynda qajetti mamandyq, bilim alýshylar metal qurylymdaryn dánekerleýdi úırenedi. Avtomobıl kóligine tehnıkalyq qyzmet kórsetý, jóndeý jáne paıdalaný – kólik jóndeý salasynda asa suranysqa ıe mamandardy daıyndaıdy. Máselen, avtomobıl jóndeý boıynsha slesar – kólikterdiń aqaýlaryn anyqtap, jóndeýge baǵyttalǵan mamandyq. Avtomobıl kóligin jóndeý sheberi – avtokólik dıagnostıkasy, tehnıkalyq qyzmet kórsetý boıynsha bilim beredi. Kolejdiń «Tigin óndirisi jáne kıim úlgileý» bólimi sán salasyna qajet mamandardy daıyndaıdy. Bilim alýshylar kıim úlgisin jasaýdy, tigýdi, sándik árleýdi úırenedi.
Túlekterimiz tabysty eńbek etip júr
Kolejimiz zamanaýı materıaldyq-tehnıkalyq bazaǵa ıe, oqý sheberhanalary, zerthanalar, tájirıbelik sabaqtarǵa arnalǵan arnaıy kabınetter bar, zamanaýı quraldarmen jabdyqtalǵan. Joǵary bilikti oqytýshylar, tájirıbeli ustazdar men óndiris salasynyń mamandary dáris beredi.
Bilim alýshylar kásibı mashyqtaryn arttyrý úshin iri kásiporyndar men sheberhanalarda óndiristik tájirıbeden ótedi. Qazirgi tańda túlekterimiz óndiris oryndarynda, qyzmet kórsetý salalarynda, jeke kásipkerlik baǵytynda tabysty jumys istep júr. Olar túrli jarystar men olımpıadalarǵa qatysyp, óz bilimderin jetildire alady.
Búginde jumysshy mamandyqtary – el damýynyń basty tiregi. Ekonomıkanyń turaqtylyǵy men halyqtyń ál-aýqaty joǵary bilikti mamandarǵa tikeleı baılanysty. Almaty jolaýshylar kóligi jáne tehnologıalar koleji osy mindetti abyroımen atqaryp, eldiń eńbek naryǵyna qajetti mamandardy daıarlap keledi. Biz bilim alýshylarymyzdyń sapaly bilim alyp, zamanaýı tehnologıalardy meńgerýine, óz isiniń sheberi atanýyna barlyq jaǵdaı jasaımyz. Túlekterimiz – el ekonomıkasynyń qozǵaýshy kúshi, qoǵamnyń suranysyna ıe mamandar.
Jumysshy mamandyǵyn ıgerý – tabysty bolashaqqa jol ashý. Óz isin jetik meńgergen, kásibı sheberligi joǵary mamandar ǵana elimizdiń óndirisin alǵa jyljytyp, jańa belesterdi baǵyndyrady.