Tabıǵatty qorǵaý aımaqtarynda ot jaqqan tártip buzýshylarǵa 306 myń teńge kóleminde aıyppul salynýy múmkin.
Bul týraly brıfıń barysynda Almaty qalalyq Tótenshe jaǵdaılar departamentiniń bastyǵy Rýslan Qasymbaev málim etti, dep habarlaıdy Almaty-akshamy.kz Egemen.kz-ke silteme jasap.
«Erekshe qorǵalatyn tabıǵı aýmaqtarda jáne belgilenbegen jerde ot jaqqany úshin Orman sharýashylyǵy mekemeleriniń qyzmetkerleri «Ákimshilik quqyq buzýshylyq týraly» Kodekstiń 367-baby boıynsha ákimshilik aıyppul salýǵa ýákiletti ekenin atap ótkim keledi, Jeke tulǵalarǵa salynatyn aıyppul somasy - 10-nan 100 AEK-ke deıin, al bul 30 630 teńgeden 306 300 teńgege deıin», - dedi Rýslan Qasymbaev.
Spıkerdiń sózinshe, tótenshe jaǵdaılar departamenti, polısıa basqarmasy men İle Alataý parkiniń qyzmetkerleri 95 reıd júrgizgen. Nátıjesinde 45 órttiń aldyn alyp, 45 tártip buzýshyny ákimshilik jaýapqa tartty.
Almaty qalasy tótenshe jaǵdaılar departamentiniń basshysy qala turǵyndary men qonaqtaryna taýly orman alqabyndaǵy órt qaýipsizdigi erejelerin eske saldy.
«Birinshi kezekte órt shyǵýy múmkin qoqystardy shyǵarý qajet. Sondaı-aq qatań belgilengen oryndardan tys janyp turǵan sirińke, temeki qaldyǵyn laqtyrýǵa, qurǵaq shópterdi jaǵýǵa, ot jaǵýǵa jáne barbekú quraldaryn paıdalanýǵa tyıym salynady», - dedi ol.
Demalýshylarǵa aqparat, İle Alataýy ulttyq saıabaǵynda ystyq tamaq pisirýge arnalǵan arnaıy jabdyqtalǵan 14 oryn (oryndyq, ústel, ot jaǵýǵa arnalǵan betondalǵan alań, barbekú), Alma-Arasan shatqalynyń aýmaǵynda 12 oryn bar. Úlken Almaty, Kazachka ózenderinde jáne Býtakovkada 2 oryn belgilengen.