Qazaqstanda ekologıalyq qundylyqtardy qalyptastyrý jáne tabıǵatqa uqypty qaraý máselesi memleket saıasatynyń basym baǵyttarynyń birine aınaldy. Memleket basshysy Qasym-Jomart Toqaevtyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýyn júzege asyrý aıasynda bul salaǵa aıryqsha nazar aýdarylyp otyr.
Qorshaǵan ortany qorǵaý tek tabıǵatty saqtaý sharasy ǵana emes, ol – urpaq bolashaǵyna degen jaýapkershilik. Osy maqsatta elimizde «Taza Qazaqstan» ekologıalyq mádenıetti damytýdyń 2024–2029 jyldarǵa arnalǵan tujyrymdamasy qabyldandy. Qujat qoǵamda ekologıalyq oı-sanany jańǵyrtyp, azamattardyń tabıǵatqa degen qatynasyn túbegeıli ózgertýge baǵyttalǵan.
Tujyrymdamada negizgi tórt baǵyt aıqyndalǵan:
-
halyqtyń ekologıalyq oılaý deńgeıin jáne minez-qulqyn jetildirý;
-
ekologıalyq jaýapty ómir saltyn yntalandyrý júıesin qurý;
-
ekologıalyq bilim berý men aǵartýdy keńeıtý;
-
ekologıa taqyrybyn aqparattyq keńistikte belsendi nasıhattaý.
Ekologıa jáne tabıǵı resýrstar mınıstri Erlan Nysanbaevtyń aıtýynsha, tujyrymdama azamattardyń tabıǵatqa degen qurmetin kúsheıtip, olardy ekologıalyq máselelerdi sheshýge belsendi qatysýǵa jeteleıdi.
Munda bıznes pen iri kásiporyndardyń úlesine de úlken mán berilgen. Olar memleketpen qatar qoǵamnyń da senimdi seriktesteri retinde tabıǵatty qorǵaý bastamalaryna belsendi aralasady. Qazirdiń ózinde elimizdegi kóptegen kompanıalar «Taza Qazaqstan» aıasynda turaqty tehnologıalardy engizip, jergilikti deńgeıde ekologıalyq jobalardy júzege asyryp otyr.
Tabıǵatty qorǵaý mádenıetin qalyptastyrý – tek bir salanyń ǵana emes, búkil qoǵamnyń mindeti. Bul baǵyttaǵy jumystar jas urpaqqa ekologıalyq jaýapkershilikti sińirip, elimizdiń ár azamatyn tabıǵatqa janashyr bolýǵa shaqyrady.
«Taza Qazaqstan» bastamasy arqyly qorshaǵan ortaǵa qamqorlyq jasaý – urpaqtar arasyndaǵy altyn kópirge aınalyp, ádiletti ári jasyl Qazaqstandy qurýǵa jol ashady.