Balany perzenthanadan shyǵaryp alý da shoýǵa aınaldy
Jýyrda Mańǵystaý oblystyq perınataldyq ortalyǵynyń ókilderi Facebook arqyly turǵyndarǵa tosyn ótinish joldady. Eldi eleń etkizgen ótinish mátinin tolyq keltire keteıik.
«Qurmetti dostar! Qazirgi kúni ǵımaratymyzdyń kireberisinde sábılerdi úıge shyǵarý sharasy shoýǵa aınaldy desek bolady. Kúnde saǵat 14.00-den bastap jumys aıaǵyna deıin ortalyq aldy toıdaǵydaı ý-shýǵa ulasyp, qyp-qyzyl bımen jalǵasyp, qymbat kólikterge, túrli anımatorlarǵa tolyp ketip, týma-týys, dos-jaran kishigirim toı jasaıdy. Qansha eskertsek te, qarapaıym halyq ta, anımatorlar da túsiner emes, dýmandy toı kúnde jalǵasýda. Turǵyndar jańa bosanǵan ana men ómir esigin ashqanyna bir jeti de tolmaǵan sábıge erekshe kútim men tynyshtyq kerek ekenin bile tura, ánshilerdi, anımatorlardy jaldap, dron ushyryp, óleń aıtyp, konsert uıymdastyrýdy úırenshikti ádetke aınaldyryp otyr.
Asa qurmetti jerlester! Eń aldymen, bizdiń ortalyq – medısınalyq mekeme. Munda tek qýanysh qana emes, basqa da jaǵdaılar bolyp jatady. Bir analar sábıin qushaǵyna alyp qýanyp jatsa, keıbiri jansaqtaý bóliminde ómir úshin kúresýde. Ásirese, óte az 500,0–700,0 gr salmaqpen dúnıe esigin ashyp, 2-3 aı boıyna arnaıy qurylǵylarda ońaltýdan ótip jatqan bóbekterge asa qajetti tynyshtyq jaǵdaıdyń buzylýy. Mýzykanyń úni daýys kúsheıtkishi arqyly qatty shyǵady jáne ol barlyq bólimge anyq estiledi. Shýly jaǵdaı medısına qyzmetkerleriniń jumystaryna da kedergi keltirýde. Ortalyq ǵımaraty tıptik jobamen salynǵan, sábılerdi shyǵarýǵa bólek, basqa oryn qarastyrý múmkindigi joq.
Iá, náresteni úıge shyǵarý – úlken qýanysh! Múmkin, zaman talaby da shyǵar. Degenmen, ár nárseniń orny, shegi bolýy kerek. Perzenthananyń aldynda toı-dýman uıymdastyrmaı, shyǵarýǵa eki-úsh jaqyn adamy kelip, jyldyń tórt mezgilinde bolatyn ystyq pen sýyqtyń, jeldiń jaısyz áserinen ana men balany saqtap, aman-esen úıine jetkizip, qýanyshty óz shańyraǵyńyzda toılasańyz, nur ústine nur bolar edi. Bizdiń ótinishimizge túsinistikpen qaraıdy degen senimdemiz. Rahmet!», delingen jazbada. Astyna perzenthana aldyn basyp alǵan, shar ustaǵan, kerneıletken, syrnaılatqan otyz-qyryq shaqty adamnyń, qaz-qatar tizilgen súlikteı qap-qara alty «Gelendvagenniń», kúnshýaqta skameıkada tynyǵyp jatqan anımatorlardyń sýretterin qosa júktepti.
Bul jazbany elýden astam adam bólisip, qóbi quptaǵan pikirler qaldyrǵan. «Durys solaı bolýy kerek. Bireý balasy shetinep jylap shyǵady. Bireýlerdiń sol dabyrany jasaýǵa qaltasy kótermeıdi. Sodan urys shyǵady. Tyıym salý kerek». «Qalalyq máslıhatpen bekitip, tyıym salý kerek, boldy. Baǵynbaǵandar aıyppul arqalasyn!». «Qoshemetti óz úıinde, aýlasynda, toıhanada jasaı berýge bolady negizi». «Bul ne maqtangerlik? Dańǵoılyq!». «Durys taqyryp qozǵap otyrsyz. Ásirese, balasynan aıyrylǵan ana úshin, sharanasy ómir úshin kúresip jatqan ana úshin óte aýyr jaǵdaı. Ana men balanyń qyryq kúndik shildesi bar, mundaı jıyn-toı istegenshe, ana men balanyń jaǵdaıyn jasasyn».
Aıtpaqshy, bul jazbaǵa avtor Densaýlyq mınıstrligimen birge mınıstrimizdi de tegtepti. Sondyqtan bul ótinish joǵaryǵa jetip, tıisti sheshim qabyldanatyn shyǵar.
Almaty da – úlken qala. Eskere júreıik degen oı ǵoı bizdiki...