«Egemen Qazaqstan» gazetinde jarıalanǵan Prezıdent Qasym-Jomart Toqaevtyń suhbaty qoǵam ómirinde úlken silkinis týǵyzdy. Memleket basshysynyń tujyrymdaryn elimiz damýynyń aldaǵy jyldarǵa arnalǵan strategıalyq baǵdarlamasy dep qabyldasaq ta bolady.
Suhbat táýelsiz elimizdiń múddesi qorǵalǵan, bolashaǵy batyl aıqyndalǵan baǵdarlardy, qoǵamdyq sanada qalyptasqan búgingi ózekti máselelerdi qamtýymen qundy bolyp otyr. Prezıdent tujyrymdary halyq kóńilinen shyqqan syndarly oılar men tyń ıdeıalarǵa toly.
Qazaqstan halyqaralyq qaýymdastyqtyń irgeli, belsendi qatysýshysy retinde shartaraptaǵy úderisten qala almaıtyny anyq. Sondyqtan aldymyzda memleketimizdiń syndarly, beıbit jáne órkenıet jolymen órleýin qamtamasyz etýdiń abyroıly paryzy turǵany belgili. Prezıdent suhbaty qazirgideı qıyn kezeńde, jan-jaqtan elimizge arandatýshylyq aqparattyq shabýyl údep turǵan tusta árbir qazaqstandyqtyń sanasyna serpindi silkinis alyp keldi.
Qazaqqa ótkennen sabaq alatyn ókinishti oqıǵalardy qaıtalamaýǵa úıretetindeı, aldaǵy ýaqyttarda tek jeńiske jeteleıtindeı tylsym kúsh kerek. Ol kúshti Prezıdent suhbatynan alýǵa bolady. Elde qasiretti qańtar oqıǵasy týraly kúdikpen qatar kúmán bar da bizdiń kóńilimiz tynysh bolmasy anyq. Prezıdent ol týraly synnan ótkizilgen aqparattarǵa ábden kózin jetkizip, alǵashqy ret ashyq aıtýy kóp jaǵdaıdan habar beredi. Sol arqyly ótken bılik gvardıasyna da, ózin opozısıalyq top sanaıtyndarǵa da taǵy bir oılanýǵa múmkindik berip otyr. Ras, ult retinde, halyq retinde, jaqsy, jaman bolsyn, bizdiń budan basqa otanymyz joq ekenin de aıtyp otyrýy kópti oılantýy tıis. Shyndyq, aqıqat qoǵamdy saýyqtyrady, ony sergitip, ońy men solyn durys tanýǵa jol bastaıdy. Bul jerde sana jańǵyrýy tıis. Sýbektıvti faktor retinde shynaıy aıtylǵan sóz halyqtyń birligin nyǵaıtatyny bılik pen halyqtyń ózara garmonıasyna pozıtıvti yqpalyn tıgizetini anyq. Mundaıda ótiriktiń órisi tar. Al «týǵan halqymyz ǵoı, sondyqtan maqtaı bereıik» degen kózqaras órge basatyn eldiń qabyldaıtyn ustanymy bolmaýy tıis. Prezıdent óz suhbatynda osy mádenıetti ádemi jetkize bilgen.
Negatıvti zarlap aıta berý qoldarynan túk kelmeıtin, ózin azamat, ult adamy retinde sezinbeıtinderge ıaǵnı, quldarǵa ǵana tán. Negatıv – rýhty tunshyqtyrýshy faktor. Alash ardaqtysy Mustafa Shoqaı: «Jaman halyq degen joq, jaman adamdar bar, adamgershiligi mol memleket degen bolmaıdy, adamgershiligi mol adamdar bolady» dep aıtqandaı, Prezıdent memleketti qorǵaıtyn, onyń ar-namysyn kózdiń qarashyǵyndaı saqtaıtyn ulttyq kadrlardy qalyptastyrýdy amanattap otyr. Jas kadrlardyń naǵyz ómir mektebi, biliktilikke tóselýi qyzmet barysynda, ujymdaǵy, aınalasyndaǵy áriptesterimen oı-qaqtyǵysy kezinde shyńdalatyny aıqyn.
Memleket basshysy elimizdiń ádil jáne básekeli ekonomıka júıesin qurý, ekonomıkany ártaraptandyrý jáne monopolıadan arylý, ınfraqurylymdy jańǵyrtý, ınvestısıa tartý jumystarymen aınalysý qajettigin eskerýi el damýynyń ilgeri basýyna bastaıtyn shara. Qabyldanyp jatqan sharalar boıynsha ardagerler qaýymy arasynda konsensýs bar. Biz Almaty qalalyq Ardagerler keńesi Prezıdenttiń suhbatta aıtylǵan bastamalaryna barynsha qoldaý bildiremiz.
Jalpy, Prezıdenttiń suhbatynda osy jáne basqa da mańyzdy máseleler jan-jaqty talqylanǵan. Onda qoǵamdy alańdatqan kóptegen saýaldarǵa naqty jaýap berilgen. Suhbat damýdyń qazirgi kezeńinde memleketimizdiń aldynda turǵan negizgi mindetterdi belgilep berýimen de qundy.