Búginde estrada ókilderi ózge eldiń ánin qazaqsha oryndaýdy jolǵa qoıyp alǵan.
Ortalyq Azıa elderi, onyń ishinde Ózbekstan men Qyrǵyzstan sazgerleriniń týyndysyn qazaqsha saıratý sánge aınalǵan. Estrada ánshileri Iordanıa sazgerlerine de jıendik jasaýdy ar sanamaıtyn kórinedi, dep habarlaıdy Almaty-akshamy.kz Egemen.kz-ke silteme jasap.
Otandyq ánshilerdiń tamasha týyndylardy qurlyq asyryp ákep oryndap júrgenin bilemiz. Dese de Qazaqstannyń eńbek sińirgen qaıratkeri, óner zertteýshisi, sazger Janǵalı Júzbaev óz qundylyǵymyzdy dáripteý mindet ekenin aıtty.
«Bıyl kúzde Astanada dúnıejúzilik kóshpendiler oıyny ótedi. Osynaý daqpyrty basym dodada biz toı toılaýdy ǵana emes, ulttyq sportymyzben qatar ónerimizdi de dáripteı bilýimiz kerek. Mádenıetimizdiń ustynyn tanytyp, túrki áleminde ónerimizdiń saltanatyn kórsetetin múmkindik ekenin esten shyǵarmaǵan jón. Shetelden keletin qonaqtardyń aldynda ótkizetin konserttik sharany da ulttyq qundylyqqa qaraı ıkemdegen abzal. Ony aıtqanym, bizde keıde bir keleńsizdik oryn alady. Aýqymy keń konserttik is-shara ótkizip, alys-jaqyn shetelden de ónerpazdar qatysqan dýmanda ánshilerimiz shyrqaǵan týyndysyn tyńdaǵanda uıalyp ta qalamyz. Óıtkeni búgingi estrada sahnasynda án shyrqap júrgen ánshilerdiń kópshiligi qyrǵyz, ózbek, qaraqalpaq, armán halqynyń ánderin alady da, qazaqshalap oryndaıdy. Parsy mádenıetine de qol saldyq, tipti, Iordanıadan da án aldyq. Ári osyndaı kirme týyndylardyń nasıhaty surapyl: telearnadan da kórsetip, radıodan da taratady», - dedi J.Júzbaev.
Óner zertteýshisi elimizde zıatkerlik menshiktiń tártibi jıi buzylatyndyqtan da sheteldik sazgerler ánshilerge jıi shaǵym aıtatynyn jetkizdi.