Onyń úlken jarys aldynda nelikten Qazaqstandy tańdaǵany belgisiz
Dzúdodan Olımpıada oıyndarynyń úsh dúrkin chempıony fransıalyq Teddı Rıner Almatyda jattyǵý jıyndaryna qatysyp jatyr. Bul týraly oqý-jattyǵýǵa qatysyp jatqan dzúdoshylardyń biri «Birinshi bol» tilshisine málimdegen, dep habarlaıdy almaty-akshamy.kz.
Onyń aıtýynsha, sportshy mańyzdy jarys aldyndaǵy daıyndyǵyn Almatyda pysyqtaýdy jón kórgen. 35 jastaǵy Rıner Almatyǵa 18 qańtar kúni kelip, jospar boıynsha 30-na deıin jattyǵý jumystaryn jalǵastyrady.
Aıta keteıik, fransýz sportshysy 2023 jyldyń basynda Almatyda oqý-jattyǵý jıyndaryna qatysqan bolatyn. Sol joly ol asa aýyr salmaqtaǵy jıyrmaǵa tarta Qazaqstan dzúdoshysymen sparrıng jattyǵýlar ótkizgen.
Qazaqstan dzúdoshylary bul jolǵy oqý-jattyǵý jıyndarynan keıin Portýgalıa jáne Parıjde ótetin halyqaralyq jarystarda baq synaıdy. Al, Rınerdiń jattyǵý alańy retinde nelikten Almatyny tańdaǵany belgisiz.
Aıta ketetin jaıt, Teddı Rıner London jáne Rıo olımpıadasynda jekeleı syn boıynsha chempıon atansa, Tokıoda komandalyq quramamen top jardy. Sondaı-aq, Beıjiń jáne Tokıo olımpıadalarynda asa aýyr salmaqta qola medalǵa ıe bolǵan. Budan bólek, ol álem birinshilikterinde onnan astam ret chempıon atandy. Eýropa birinshilikterimen qatar, kóptegen halyqtaralyq Gran-prı, Grand-slem básekeleriniń jeńimpazy. Rıner 2010 jyldan 2020 jyldar arasynda júz elýden astam beldesýge deıin qarsylastaryn jeńip, rekord ornatqan sportshy.