Máskeýde Qazaqstan Respýblıkasy Sybaılas jemqorlyqqa qarsy is-qımyl agenttiginiń Tóraǵasy Asqat Jumaǵalıdiń Reseıdiń Bas prokýrory Igor Krasnovpen ekijaqty kezdesýi ótti, dep habarlaıdy almaty-akshamy.kz.
Kezdesý barysynda ekijaqty yntymaqtastyqtyń, onyń ishinde ózara quqyqtyq kómek kórsetý, sıfrlyq sheshimderdi paıdalaný, adamdardy izdestirý, oqytýdy uıymdastyrý, birlesken jobalardy iske asyrýdyń basym máseleleri talqylandy.
Zańsyz satyp alynǵan aktıvterdi memleketke qaıtarý, olardy qarjylyq tergeý júrgizý kezinde anyqtaý máselelerine erekshe nazar aýdaryldy.
İs-shara barysynda A.Jumaǵalı Agenttiktiń qyzmetine jáne eldegi jemqorlyqqa qarsy is-qımyl boıynsha qabyldanyp jatqan sharalarǵa egjeı-tegjeıli toqtaldy.
«Biz Agenttiktiń jumysynda aldyn alý jáne qylmystyq-quqyqtyq quraldardyń teńgerimin sanaly túrde qamtamasyz etýge tyrysamyz, jemqorlyqsyz qoǵam qurý maqsatynda azamattarmen belsendi qarym-qatynas jasaımyz. Biz ózara is – qımyl úshin ashyqpyz jáne birlesken jobalardy iske asyrýǵa daıynbyz», - dedi A.Jumaǵalı.
Kezdesý aıasynda Reseı Prezıdenti Ákimshiligi men Bas prokýratýrasynyń ókilderi qazaqstandyq delegasıany «Poseıdon» jemqorlyq jáne ózge de quqyq buzýshylyqtardyń aldyn alý jónindegi aqparattyq-taldaý júıesimen tanystyrdy. Bul júıe deklarasıalaý jónindegi talaptar qoldanylatyn tulǵalardyń kiristeri men shyǵystary týraly aqparatty jınaýdy jáne óńdeýdi júzege asyrady.
A. Jumaǵalı «mundaı júıeler jemqorlyqqa qarsy kúrestiń tıimdiligine sózsiz áser etip, engizilip jatqan kirister men shyǵystardy jalpyǵa birdeı deklarasıalaý júıesi sheńberinde negizsiz baıytýdy baqylaýdy júzege asyrý kezinde Qazaqstanda qoldaný turǵysynan zerdelenedi.
Jalpy, memlekettik qyzmetterdi sıfrlandyrý, adamı faktordy alyp tastaý, bıznes prosesterdiń ashyqtyǵy, «aqshany boıaý» tetigin engizý, derekter bazasyn ıntegrasıalaý jemqorlyqty edáýir azaıtýǵa múmkindik beredi» dep atap ótti.
Ekijaqty kezdesýdiń qorytyndysy boıynsha eki eldiń organdary arasynda ózara túsinistik týraly Memorandýmǵa qol qoıyldy.
Kezdesý sońynda Agenttik Tóraǵasy A. Jumaǵalı reseılik áriptesterine is-sharany uıymdastyrǵandary úshin alǵys bildirip, aldaǵy jumystaryna tabys tiledi.