Alynǵan shıkizat aldymen zerthanada taldanady.
1940-shy jyly irgetasy qalanǵan Qaratal aýdanyndaǵy zaýyt búginde qanaty qomdaǵan kásiporyn. 1996 jyly «Aıdyn» AQ bolǵan maı zaýyty, 1998 jyly óndiristik kooperatıv bolyp túrlenedi. Al 2002 jyly «Úshtóbe-Aıdyn» JSHS retinde nyq bekidi. Sodan beri úzdiksiz jumys jasap kele jatqan ónerkásiptiń tasy órge domalap, ónimderimen tutas Jetisý jerin qamtamasyz etip otyr, dep habarlaıdy Almaty-akshamy.kz.
Qazirgi tańda atalǵan seriktestik kúndigine 10-12 tonna sút pen ashyǵan sút ónimderiniń 16 túrin shyǵarady.
Negizgi shıkizat kózi - sıyr súti. Kásiporyn sútti odan ári óńdeý úshin sharýa, fermer qojalyqtary men jeke kásipkerlerden satyp alady. Seriktestik qajetti sútti ózderiniń kólikterimen tasymaldaıdy. Alynǵan shıkizat aldymen zerthanada taldanady.
«Sútten analız alamyz. Onda óniminiń qyshqyldyǵyn, tyǵyzdyǵyn, maılylyǵyn tekseremiz. Artynsha qaınatyp, organıkalyq sapasyn baqylaımyz. Zertteý nátıjesi jaqsy shyqsa ary qaraı paıdalanýǵa ruqsat etiledi. Aıtyp óteıin, bizdegi sút ónimderi tabıǵı shıkizattan jasalatyn bolǵandyqtan jaramdylyq merzimi úsh kún ǵana»,-dedi «Úshtóbe-Aıdyn» JSHS-niń zerthana mamany Tolqyn Bolysbekova.
Kásiporynda kúnine 500-600 kg irimshik naryqqa jóneltiledi. Al, jalpy zaýytta 4 seh damylsyz jumys jasaıdy. Onda 85 qyzmetker eńbek etedi. «Úshtóbe-Aıdyn» JSHS áleýmettik mańyzy bar sút ónimderin óndirý úshin 100% jergilikti eńbek resýrstaryn jáne 100% jergilikti shıkizatty paıdalanatyn otandyq taýar óndirýshi bolyp tabylady.
Qazaqstanda alǵashqylardyń biri bolyp «Úshtóbe-Aıdyn» JSHS ıod jetispeýshiliginiń aldyn alý jáne Qazaqstan Respýblıkasynyń turǵyndarynda ıod almasýyn retteý úshin «aqyldy ónimder», ıaǵnı ıodtalǵan aqýyzben baıytylǵan sút jáne qyshqyl sút ónimderin óndirýdi ıgerdi.
Zaýyttaǵy 16 túrli taýardyń ishindegi eń áıgilisi - «Úshtóbe balmuzdaǵy».
Dámi til úıiretini sonsha 1999 jyldan beri tutynýshysynan aıyrylmaǵan ónimderdiń ishinde biregeıi. Aǵa býyn «balalyq shaqtyń dámi» dep eske alatyn bul balmuzdaq, «Úshtóbe-Aıdyn» JSHS-niń negizgi tólqujaty desek artyq aıtqandyq emes.
Almaty oblysynyń halqyn tabıǵı ónimmen qamtamasyz etip otyrǵan jetekshi kásiporynnyń Taldyqorǵan, Tekeli, Úshtóbe, Qarabulaq, Balpyq bı qalalarynda ornalasqan fırmalyq dúkenderi bar, onda sút ónimderi óndirýshiniń baǵasymen satylady.
Sondaı-aq, 1999 jyldan bastap qazirgi ýaqytqa deıin "Úshtóbe-Aıdyn" JSHS Almaty q., Taldyqorǵan q., Qarabulaq k., Tekeli q. jáne Úshtóbe q. mekemelerine azyq-túlik ónimderin Memlekettik satyp alý boıynsha sút ónimderin jetkizýdi júzege asyrady. Sút ónimderin úzdiksiz jetkizýdi qamtamasyz etý úshin 31 birlik arnaıy avtokólik bar.
«Tutynýshylardyń údesinen shyǵý úshin qoldan kelgendi jasaımyz. Ónimniń sapasyna, qaptamasyna, syrtqy dızaınyna asa mán beremiz. Aldaǵy tańda qajetti quryl-jabdyqtardy alyp kelý josparlanǵan. Jańa tehnologıalardyń kómegimen óndiretin zattyń kólemin arttyryp, naryqtaǵy ornymyzdy odan ary nyǵaıtsaq degen josparymyz bar. Sonymen qatar, jańa jumys ornyn ashýda kózdelgen »,-deıdi «Úshtóbe-Aıdyn»JSHS basshysy Konstantın Savınov.