5 qazanda Ábilhan Qasteev atyndaǵy Qazaqstan Respýblıkasynyń Memlekettik óner mýzeıinde belgili qazaqstandyq sýretshi, «Qurmet» ordeniniń ıegeri, QR Qolónershiler odaǵynyń tóraıymy Aıjan Bekqulovanyń 70 jyldyq mereıtoıyna arnalǵan «KAÓ» atty jeke kórmesi ashylady.
«KAÓ» kórmesi Aıjan Bekqulovanyń 1990 jyldardan bastap qazirgi ýaqytqa deıin jasaǵan júzden astam shyǵarmasyn usynady. Retrospektıvalyq ekspozısıada: toqyma, kıiz basý, qasıetti qýyrshaqtar, zergerlik áshekeıler, etnıkalyq kıimder, sondaı-aq metaldan, keramıkadan, aǵashtan jáne kıizden jasalǵan, basqa sheberlermen jáne sýretshilermen birlesip jasalǵan jumystar usynylǵan. Bul jeke kórme jınaqtalǵan tájirıbeniń, túrli elderdiń mádenıetterimen tanysýdyń, túrli tehnologıalardyń kórkemdik kórinisteriniń ereksheligi týraly kóp jyldyq oılardyń, shyǵarmashylyq adamdarmen áńgimeler men suhbattardyń nátıjesi. Kórmege qoıylǵan jumystar ony ulttyq mádenı kodtyń genetıkalyq sezimine negizdelgen jáne qazirgi zamannyń yrǵaqtarymen, nysandarymen, belgilerimen, oı úlgilerimen baıytylǵan ózindik avtorlyq qaıtalanbas stılin qalyptastyrǵan daryndy sýretshi retinde kórsetedi, — deıdi kórme jetekshisi A.Aqylbekova.
Aıjan Bekqulova Almatyda dúnıege kelgen. 1976 jyly Halyq sharýashylyǵy ınstıtýtyn qyzyl dıplommen bitirip, sodan keıin “Qazaqfılm” kınostýdıasyna Kınokartına dırektory qyzmetine jumysqa ornalasty. Sergeı Solovev, Iraklıı Kvırıkadze, Sergeı Bodrov sıaqty kórnekti kınomatografıstermen jumys istedi.
1981 jyly Máskeýdegi KSRO GOSKINO janyndaǵy Búkilodaqtyq kınematografıa shyǵarmashylyǵy jáne basshy qyzmetkerleriniń biliktiligin arttyrý joǵary kýrsyn aıaqtap, kınostýdıadaǵy jumysyn jalǵastyrdy. 1993 jyly T.Júrgenev atyndaǵy teatr-kórkemsýret ınstıtýtyn «Monýmentaldy toqymashylyq» mamandyǵy boıynsha bitirdi. Sol jyldan ol «Shyǵarmashylyq bastamashy áıelder lıgasynyń» birlesken uıymdastyrýshysy jáne vıse-prezıdenti boldy. Lıga búginge deıin túrli salalarda áıelderdi áleýmetik qoldaý jáne bilim jetildirý máselelerimen aınalysyp keledi.
2003 jyldan Aıjan «Our Heritage» (Bizdiń mura) qoǵamdyq qorynyń prezıdenti retinde qoǵamdyq qyzmetter atqardy. Qordyń negizgi mindeti - Qazaqstan qolónerin jańǵyrtý, saqtaý jáne damytý.
2005 jyly «Our Heritage» qoǵamdyq qorynyń atynan QR Mádenıet mınıstrligimen, UNESCO jáne Eýrazıa qorymen birlesip, Shevron, KCell t.b. kompanıalardyń qarjylyq qoldaýymen «Qazaqstanda qolónerdi damytý jáne halyq kórkemóner kásipshiligin jańǵyrtý» taqyrybymen qolónerdi damytý jónindegi ulttyq baǵdarlamany ázirleý maqsatynda atalmysh baǵdarlamanyń Qazaqstandyq úılestirý keńesin qurdy. Qolónershilikti damytý jónindegi ulttyq baǵdarlama qurylǵannan keıin «Our Heritage» qory ony iske asyrýǵa kiristi. Astanada uıymdastyrylǵan qolónershilerdiń İ halyqaralyq konferensıasyna 150 delegat qatysty, olar úshin Qor bıznes negizderi, marketıń, Qazaqstannyń dástúrli qolóneri - zergerlik óner, kıiz, aǵash oıý, keste tigý, kilem toqý boıynsha Qazaqstannyń Óskemen, Qaraǵandy, Astana, Shymkent, Aqtóbe, Aqtaý, Almaty jáne t.b. qalalarynda oqytý semınarlaryn uıymdastyryp ótkizdi.
Aıjan Bekqulova 2009 jyly «Sheber» qazaqstandyq sheberler festıvaline bastamashy boldy. Baıqaý qolónershilerdiń sheberligin, qolóner buıymdarynyń sapasyn arttyrýǵa, umyt qalǵan tehnologıalar men qoldanbaly óner tehnıkalarynyń assortımentin keńeıtýge jáne jańǵyrtýǵa yqpal etti. Al 2012 jyly Qazaqstan Qolónershiler odaǵyn qurdy, ol qazir ózimizde ǵana emes, elimizden tys jerlerde de eleýli mártebege ıe qoǵamdyq uıym.
2013 jyldan bastap Aıjan Bekqulova Qazaqstan qol qoıǵan Materıaldyq emes mádenı mura týraly IýNESKO konvensıasynyń aıasynda Materıaldyq emes mádenı mura jónindegi Ulttyq komıtettiń (MUK) múshesi jáne sarapshysy bolyp tabylady. Aıjan kóp jyldar boıy Qazaqstanda jáne elden tys jerler - Fransıada, Germanıada, AQSH-ta, Qytaıda, Úndistanda jáne basqa da kóptegen elderde festıvál, kórme men konkýrstardyń kýratory jáne uıymdastyrýshysy retinde belsendi qyzmet atqaryp keledi. Qazirgi ýaqytta Aıjan dástúrli jáne qazirgi zamanǵy sándik-qoldanbaly óner boıynsha sarapshy, Qazaqstannyń qolónershiligi boıynsha maqalalardyń uıymdastyrýshysy, spıkeri, kýratory, jattyqtyrýshysy jáne avtory. Sondaı-aq stýdentter men oqytýshylar, kásibı sheberler úshin Qazaqstan, Túrikmenstan, Qyrǵyzstan jáne basqa da elderde Qazaqstannyń qolóneri men ónerin tanymal etý maqsatynda kóptegen halyqaralyq konferensıalarda, sımpozıýmdarda, forýmdarda qyzmet atqarady.
— Men árqashan erekshe adamdardy kezdestirý baqytyna ıe boldym. Olar álemge jáne jeke ómirge degen meniń kózqarasymda sheshýshi ról atqarady. Kisini tań qaldyratyn, shabyttandyratyn, qýantatyn jáne dúnıetanymyn ózgertetin ol - adamdar. Olar úıretedi, aqyl-keńes beredi, sizdiń pikirińizdi surap, óz oıymen bólisedi. Meniń jeke kórmem – maǵan kóńil bólgen, qarym-qatynas, qýat bergen, tek jaǵymdy sezimder ǵana emes, sonymen birge shyǵarmashylyǵyma qushtarlyq syılaǵan adamdarǵa bildirgen úlken alǵysymnyń belgisi. Menimen birge shyǵarmashylyq yntymaqtastyqta jumys istegenderge rahmet, — deıdi Aıjan Bekqulova.