Senat depýtattary, atom elektr stansasyn salý jónindegi halyqtyq shtab músheleri Álibek Náýtıev pen Saǵyndyq Luqpanov Atyraý oblysy, Mahambet aýdanyna saparmen bardy. Olar Beıbarys aýylynda bilim salasynyń qyzmetkerlerimen kezdesip, atom elektr stansasynyń qurylysy men onyń oblys jáne el úshin mańyzdylyǵyn túsindirýge basa nazar aýdardy.
Senatorlar AES qurylysynyń Qazaqstannyń energetıka salasynyń turaqty damýyna ǵana emes, eldiń energetıkalyq táýelsizdigin nyǵaıtýǵa jáne ekonomıkaǵa oń áser etetinine toqtaldy. Sonymen qatar, atom elektr stansasy ekologıalyq taza energıanyń senimdi kózi retinde mańyzdy ról atqaratynyn atap ótti.
Depýtattar álemniń jańartylatyn jáne ekologıalyq taza energıa kózderine kóbirek kóship jatqanyn, al atom energetıkasy osy aýysýlardyń negizgi quramdas bóligi ekenin aıtty. Olar AES kómirtekti energıa kózderine táýeldilikti azaıtý arqyly qorshaǵan ortaǵa tıgizetin oń áserin egjeı-tegjeıli túsindirdi.
Sondaı-aq, Parlament depýtattary Memleket basshysynyń qyrkúıektegi Joldaýynda aıtylǵan negizgi maqsattar men mindetterge toqtalyp, olardyń energetıka salasyna tikeleı qatysy bar ekenin túsindirdi. Memleket basshysynyń usynǵan damý baǵyttary árbir salany, sonyń ishinde energetıkalyq sektordy jańa deńgeıge kóterýge baǵyttalǵany aıtyldy.
Depýtattar kezdesý barysynda qatysýshylardyń bıylǵy qazan aıynda ótetin referendým týraly suraqtaryna jaýap berip, elimizdiń energetıkalyq strategıasynyń bolashaǵy azamattardyń sheshimine baılanysty bolatynyn atap ótti. Olar turǵyndardy referendýmǵa belsendi qatysyp, óz daýystaryn berýge shaqyrdy.