AES salýdy qoldaý jónindegi Halyqtyq shtabtyń óńirlerge sapary jalǵasýda. Búgin Shtab músheleri Soltústik Qazaqstan oblysyna baryp, jergilikti sharýalarmen, belsendi azamattarmen jáne ǵylymı-saraptamalyq qoǵamdastyq ókilderimen birneshe kezdesý ótkizdi, dep habarlaıdy aqshamnews.kz
Chapaev aýylyndaǵy «Qyzyljar sút» JSHS alańynda ótken kezdesýde Shtab músheleri óńirdegi aýyl sharýashylyǵy taýaryn óndirýshilermen pikir almasty. Sońǵy bes jylda SQO-da sút óndirisi 100 myń tonnadan astamǵa ósip, búginde elde óndiriletin súttiń 10%-dan astamy osy óńirde óndiriledi. Sonymen qatar, «Aýyl amanaty» jobasy aıasynda óńir turǵyndary jalpy somasy 79 mlrd teńgeni quraıtyn 12,7 myń nesıe alyp, ol qarajat mal satyp alý, sharýa qojalyqtaryn damytý, jylyjaılar salý jáne tehnıkany jańartýǵa baǵyttaldy. Bul jobalar turaqty ári mol elektr energıasyn qajet etedi.
Májilis depýtaty, «AMANAT» partıasy fraksıasynyń jetekshisi Elnur Beısenbaev AES salýdyń aýyl sharýashylyǵyn damytýdaǵy strategıalyq mańyzyn atap ótti. Ol atom reaktorlarynyń tekserilgen jáne senimdi energıa kózi retinde aldyńǵy qatarly elderdiń tájirıbesine súıene otyryp, Qazaqstannyń da osy baǵytta damý kerektigin aıtty.
«Atom reaktorlary álemniń kóptegen elderinde senimdi energıa kózi retinde keńinen qoldanylady. Qazaqstan ýran qory boıynsha álemde 2-orynda, al ony óndirýde 1-orynda tur. AES turaqty energıa kózi retinde apattyq jaǵdaılardy boldyrmaýǵa jáne elimizdiń energetıkalyq turaqtylyǵyn qamtamasyz etýge múmkindik beredi. Bul, óz kezeginde, aýyl sharýashylyǵynyń odan ári damýyna jol ashady», – dedi ol.
Kezdesýde sharýalar da AES qurylysyna qoldaý bildirip, onyń kásiporyndardyń turaqty jumys isteýi úshin senimdi energıamen qamtamasyz etetinin jáne agroónerkásip kesheniniń damýyna yqpal etetinin atap ótti.