Elimizde aqyly avtoturaqtardaǵy tólemdi jasamaı ketken júrgizýshilerge aıyppul salynbaýy múmkin. Qazirgi tańda Ákimshilik quqyq buzýshylyq týraly kodekske túzetýler engizý máselesi Májiliste talqylanyp jatyr, dep habarlaıdy aqshamnews.kz.
Májilis depýtattary ákimshilik quqyq buzýshylyq týraly kodekske ózgerister engizip, aqyly turaqtardan túsken qarjynyń 75%-yn alyp otyrǵan jeke memlekettik seriktesterge jaýapkershilikti kúsheıtýdi kózdep otyr. Jańa zań qabyldanyp, kúshine engen jaǵdaıda, aqyly avtoturaqqa kóligin qoıa turyp, tólemeı ketken azamattardyń jaǵdaıy ózgermek. Ár kompanıa ákimshilik sotqa júginýge májbúr bolady.
Nartaı Sársenǵalıev, QR Parlamenti Májilisiniń depýtaty: "Zań kúshine ense, kóligin qoıyp ketip qalǵan adam úshin kompanıalar sotqa barýǵa májbúr bolady. Ár 100 teńge úshin sottasý qajet pe?" — dep pikir bildirdi.
Elordada qazirgi tańda 7216 aqyly avtoturaq jumys isteıdi. 2018 jyly jasalǵan kelisimshartqa sáıkes, olardyń sany 10 myńǵa deıin jetedi. Degenmen, qala búdjeti aıtarlyqtaı artyp jatqan joq, sebebi túsken aqshanyń tek 25%-y ǵana búdjetke túsedi. Mysaly, ótken jyly Astana halqy aqyly avtoturaqtarǵa 250 mıllıon teńgeden astam aqsha tólegen. Bul másele depýtat Nartaı Sársenǵalıevti alańdatýda.
Nartaı Sársenǵalıev: "Bul qarjynyń 100% búdjetke túsýi tıis. Qazir jekemenshik kompanıalar ózderiniń múddesin qorǵap, qarjynyń kóbin alyp otyr. Bul máselemen kúresýimiz kerek."
Jergilikti bılik bul máseleni aıtarlyqtaı alańdatpaıtyn sıaqty. Olar jobanyń basty maqsaty qala búdjetin toltyrý emes, jol qozǵalysynyń trafıgin retteý ekenin aıtady. Sonymen qatar, aqyly avtoturaqtardy kútip ustaý tek ákimdiktiń mindetine kiredi, al jeke seriktestiktiń mindetine turaq oryndaryna aqparattyq belgilerdi qoıý, arnaıy jolaqtardy syzý jáne ereje buzǵan kólikterdi anyqtaý jumystary jatady.
Baýyrjan Kúmisbekov, Kólik jáne jol-kólik ınfraqurylymyn damytý basqarmasynyń bas mamany: "Aqyly avtoturaqtar komýnaldyq menshik retinde ákimdiktiń menshiginde bolǵandyqtan, onyń kútip-baptalýy da ákimshiliktiń moınynda."
Depýtat Nartaı Sársenǵalıev aqyly avtoturaqtardaǵy qaýipsizdik máselesine de nazar aýdarýdy usyndy. Onyń aıtýynsha, turaqta turǵan kólikti urlap ketý jaǵdaılary oryn alsa, ákimdik pen jeke kompanıa jaýapkershilikti moınyna almaıdy, tek qarjyny qaltaǵa basýdy bilýde.
Depýtattyń saýalyna Premer-Mınıstrdiń birinshi orynbasary Roman Sklár jaýap berdi. Ol aqyly avtoturaqtarda tegin turý ýaqytyn 30 mınýtqa uzartý, aýmaqty kútip ustaýdy jeke kompanıalarǵa mindetteý jáne erejelerdi memlekettik organdardyń jazýy qajettigin atap ótti.