«QazjolǴZI» AQ «Sýperasfalt» tehnologıasyn Qazaqstanǵa engizý úshin ulttyq standarttardy ázirleýdi jalǵastyrýda.
Osyǵan oraı, otandyq ǵalymdar osy tehnologıany ázirleýshilerdiń biri, profesor Hýsseın Bahıamen jáne Honeywell (AQSH) kompanıasynyń ókilderimen kezdesti. Yntymaqtastyq aıasynda joldardyń uzaq merzimdiligin jáne tıimdiligin arttyrýǵa baǵyttalǵan ozyq tehnologıany elimizdiń joldaryna beıimdeý múmkindikteri talqylandy, dep habarlaıdy aqshamnews.kz.
Amerıkalyq sarapshylarmen yntymaqtastyq ádistemelik jáne ǵylymı-praktıkalyq deńgeıde júzege asyrylyp, jóndeýaralyq merzimderdi ulǵaıtýǵa jáne paıdalaný shyǵyndaryn azaıtýǵa baǵyttalǵan.
«Sýperasfalt» ádistemesin elimizdiń avtojol jobalaryna kezeń-kezeńimen engizý boıynsha 2025–2030 jyldarǵa arnalǵan jol kartasy ázirlendi. Bul ádisteme AQSH, Reseı jáne basqa da elderde sátti júzege asyrylǵan. Onyń birinshi kezeńi — ulttyq standarttardy ázirleý. Qazirgi ýaqytta «QazjolǴZI» «Sýperasfalt» tehnologıasyn engizý úshin qajetti úsh negizgi ulttyq standartty ázirleýdi aıaqtaýda. Kelesi jyly pılottyq joba aıasynda jańa standarttar boıynsha alǵashqy asfáltbeton jamylǵylarynyń alǵashqy kılometrleri salynady», — dep atap ótti «QazjolǴZI» AQ vıse-prezıdenti Erik Ámirbaev.
Aldaǵy jyldary pılottyq jobalarǵa ǵylymı-tehnıkalyq qoldaý kórsetý jáne tájirıbelik ýchaskelerdi baqylaý júzege asyrylatyn bolady. Nátıjesinde «Sýperasfalt» tehnologıasynyń tıimdiligine baǵa berilip, jańa standarttarǵa kóshý týraly sheshim qabyldanady.
Ádisteme belgili bir aımaqtardaǵy bıtýmdy baılanystyrýshy materıaldardyń paıdalaný jaǵdaılaryn, sondaı-aq kólik júktemeleri men qozǵalys qarqynyn eskeredi. Bul standarttardy engizý el ınfraqurylymyn jańǵyrtýdaǵy mańyzdy qadam bolyp, joldardyń qyzmet etý merzimin aıtarlyqtaı arttyryp, olardy kútip ustaýǵa ketetin shyǵyndardy azaıtady dep kútilýde.
Aıta keteıik, álemniń 120-dan astam elinde tabysty qoldanylatyn «Sýperasfalt» tehnologıasy klımattyq jaǵdaılarǵa jáne qarqyndy trafıkke joǵary tózimdi jol jabyndaryn jobalaýǵa múmkindik beredi. Bul bes klımattyq aımaǵy bar Qazaqstan úshin asa ózekti másele.