Qazaqstanda patrúldik polısıa qyzmetkerlerine ıshara tilin bilý mindettelgeni jaıynda İshki ister mınıstrliginiń resmı ókili Shyńǵys Álekeshev aıtty, dep habarlaıdy aqshamnews.kz.
Onyń aıtýynsha, ıshara tilin bilý polısıa qyzmetkerlerine estý qabileti buzylǵan adamdarǵa kómektesý kezinde jáne tótenshe jaǵdaılarda jedel áreket etýge kómektesedi.
Erekshe qajettilikteri bar adamdar jıi qıyn nemese qaýipti jaǵdaılarǵa tap bolady. Sondyqtan bizdiń barlyq patrúldik polısıa qyzmetkeri adamǵa qoldaý jáne qajetti kómek kórsetýge múmkindik beretin qarapaıym qımyldardy meńgeredi. Bul – jaı ǵana resmılik emes, adam ómirin saqtap qalatyn mańyzdy daǵdy, – dedi Shyńǵys Álekeshev.
Onyń aıtýynsha, árbir patrúldik qyzmetker «Ýaıymdamańyz, polısıa sizben birge, biz sizge kómektesemiz» degen sózderdi ymmen kórsete bilýi kerek.
Bul ásirese aýdarmashy tabýǵa ýaqyt joq nemese qarapaıym, biraq mańyzdy habardy jedel jetkizýdi qajet etetin tótenshe jaǵdaılarda óte mańyzdy. Bul tásil polısıaǵa estý qabileti buzylǵan adamdarmen tez baılanys ornatýǵa múmkindik beredi, – dedi mınıstrlik ókili.