balaqaılardyń alǵashqy qadamy
Ǵabıt Músirepov atyndaǵy Qazaq memlekettik balalar men jasóspirimder teatrynda Sharl Peronyń «Sulý men Qubyjyq» múzıkli sahnalandy. Qoıylymda Shoqan Ýálıhanov atyndaǵy orta mekteptiń 3 «v» synybynyń oqýshylary óner kórsetti. Olardyń akterlik sheberligine kórermender de tánti boldy. Spektákl premerasynda Qazaqstannyń halyq ártisi, teatr jáne kınorejısser, kınodramatýrg Talǵat Temenov óte joǵary baǵasyn berdi.
«Mektep oqýshylaryna bıden sabaq beremin. Degenmen, ekinshi mamandyǵym rejıserlik. Biraq osy ýaqytqa deıin úlken sahnalarda qoıylym qoıǵan emespin. Osy synyptyń ónerli ekendigin byltyr baıqaǵanmyn. 20 oqýshynyń árqaısysy jeke-dara ónerli. Osylaısha balaqaılardyń ónerin ushtastyra otyryp, «Sulý men Qubyjyq» qoıylymyn sahnaladyq. Spektáklge daıyndalýǵa 4 aı ýaqytymyz ketti. Bul spektákl oqýshylarǵa da, maǵan da ónerdegi qadamymyz boldy. Qarap otyrsaq, balalarǵa arnalǵan qazaqtildi qoıylymdardyń sany óte az. Osy olqylyqtyń ornyn toltyrý maqsatynda aldaǵy ýaqyttarda taǵy da qoıylymdardy usynbaqpyz», – deıdi qoıýshy-rejısser Azat Daýtov.
Ózderi kishkentaı bolsa da oılary júrik balaqaılar ánderin múdirmeı, bılerin tamasha oryndap shyqty. Kórermender oqýshylardyń ónerine tamsanyp, erekshe iltıpatyn bildirdi. Uıymdastyrýshylar balalarǵa qoldaý bildirgen Ǵ.Músirepov teatryna alǵys aıtty.
«Byltyr «Býratıno» qoıylymyn sahnalaǵan edi. Men olardyń ónerin sol kezden baıqaı bastadym. Osylaısha Azatpen birigip spektákl qoıýdy uıymdastyrdyq. Ata-analarynyń da qoldaýy boldy. Balaqaılardyń zerektiligi sonsha, 1 aıdyń ishinde sózderdi jattap aldy. Akterlik pen sabaqtaryn da qatar alyp júrdi. Bul qoıylym án men bıdiń ushtasqan kollaborasıasy desem, artyq aıtpaǵanym. Balalardyń tili anyq, óz rólderin jaqsy alyp shyqty dep aıta alamyn. Balalardyń barlyǵy da talantty, ónerli. Barlyǵy bizdiń mekteptegi akterlik sahnada tálim alady. Qoıylymnyń aýdarmasyn, sózin ózimiz jazdyq. Spektákldegi ánderdi balalar óz daýsymen shyrqady. Kıimderin ata-analar óz qaltalarynan kóterdi. Bizdiń mekteptiń atynan shyqqan ónerli synyp dep maqtanyp aıta alamyn»,– deıdi uıymdastyrýshy, vokal boıynsha jetekshi Nasıha Gýmarova.
Kórermen árbir keıipkerden ózgeshe kúsh pen tańqalarlyq qabiletti baıqaı kele, olardyń bir ǵana maqsatqa – jaqsylyq pen ádildikke úndeıtin arman-tilegin sezinýge múmkindik alady. Uıymdastyrýshylardyń pikirinshe, oqýshylardyń oryndaýyndaǵy spektáklder aldaǵy ýaqytta úlken sahnalarda da qoıylmaq. Oqıǵa jelisi men keıipkerler is-áreketin saralaý barysynda jas jetkinshek jaqsy men jamannyń arajigin ajyratyp, ózindik pikir qalyptastyryp úırenedi degen úmittemiz.