2023 jyldan bastap keminde 5 jyl jumys ótili bar óndiristen tartylǵan pedagogterge atestattaýdan ótpeı «pedagog – moderator» biliktilik sanaty beriledi.
Sondaı-aq, Oqý-aǵartý mınıstrligi olarǵa jalaqysynyń 30% mólsherinde qosymsha aqy tólenetinin de málimdedi, dep habarlaıdy Almaty-akshamy.kz QazAqparata silteme jasap.
Eńbek ótili 10 jyldan asatyn pedagogterge jalaqyǵa 35% ústemeaqy tólenip, sarapshy sanaty beriledi. Bul týraly QR Oqý-aǵartý mınıstrliginiń Tehnıkalyq jáne kásiptik bilim departamentinde aıtyldy.
«Barlyq qajetti kásibı tehnologıalardy meńgergen bilikti maman daıarlaýda negizgi oryn oqý sheberleri men kolejdiń arnaıy pán pedagogterine tıesili. Óıtkeni olar stýdentterge bilim berip qana qoımaı, daǵdy qalyptastyrý úshin óziniń ómirlik tájirıbelerimen bólisip, óndiristegi bilgenin úıretedi. Sondyqtan óndiristen tartylǵan pedagogter úshin osy sharalar qarastyrylǵan. Kolejderde alǵash ret pedagogıkalyq qyzmetke kirisken jáne keminde 2 jyl óndiristik ótili bar mamandar testileýden ótpeı-aq «pedagog» biliktilik sanatyn ala alady. Sonymen qatar óndiristik oqytý sheberleri men arnaıy pán oqytýshylary atestattaýdan ótý kezinde testileýden bosatylady, tek qyzmet nátıjeleriniń jalpy keshendi tekserýinen ótedi. Bul ózgerister kolej pedagogterin yntalandyratyn bolady jáne kadr daıarlaý sapasyn arttyrady»,– deıdi departament dırektory Ernat Júnisov.
Sondaı-aq, zeınetkerlik jasyna 4 jyl qalǵan pedagogter, 30 jáne odan da kóp jyl pedagogıkalyq ótili bar pedagogter buryn berilgen biliktilik sanatyn rastaǵan kezde testileýden bosatylatyn bolady.