Qurma jemisin kez kelgen saýda núktesinen tabasyz. Degenmen, bul jemistiń qadiri Oraza aıy kezinde artyp, dúkenderdiń de, dastarhan men aýyzashardyń da sánine aınalyp shyǵa keledi desek, qatelespespiz.
Islam áleminde qurmanyń orny erekshe. Ol – Quran aıattarynda kóp kezdesetin jemis túri. Sondyqtan Orazada musylmandar aýyzdy qurmamen ashýdy súnnet dep sanaıdy. Ǵalymdar bul jemistiń quramyn zerttegen kezde, kóptegen paıdaly zattardy anyqtaǵan.
Quramynda kalııdiń joǵary bolýy sebepti qazirgi dárigerlerdiń ózi qurmany júrek qan-tamyr aýrýlaryna paıdalanýǵa keńes beredi. Júrek aýrýlary men talmasynyń aldyn alady. Júıke júıesine de áser etip, tynyshtandyratyn qasıetke ıe. Sondaı-aq, qurmanyń quramy magnııge óte baı eken. Al magnıı adam aǵzasynda asa qaterli obyr dertiniń paıda bolýyna tosqaýyl qoıady.
Qurma – teriniń qurǵaýy, erinniń tilinip ketýi, shashtyń túsýi, tyrnaqtyń synýy sekildi jaǵdaılarda da óte paıdaly desedi. Onyń quramynda óte kóp mólsherde qant bar eken, ıaǵnı 60–65 paıyzdaı. Bul barlyq jemispen salystyrǵandaǵy eń úlken kórsetkish. Sondyqtan tátti kámpıtterdiń ornyna qurmany jeseńiz tipti jaqsy. Aıtpaqshy, Izraılde qurma men almaǵa qatar zertteý júrgizilgende, almaǵa qaraǵanda qurmada dárýmenderdiń kóptigi dáleldengen.
Qurma sonymen qatar, baýyrdy toksınderden tazartady eken. Ash qarynǵa jese, ishektegi, baýyrdaǵy qurttardy óltirýge qaýqarly. Qurmany, ásirese, ekologıasy nashar aýdandarda turatyn adamdarǵa jeýge keńes beriledi.
Endeshe, qurmadan qur qalmaıyq. Tutqan Orazańyz qabyl bolsyn!
Ázirlegen Nur JAMAL.