Stýdentter sýdy tazartý ádisin oılap tapty.
Sý resýrstary jáne ırrıgasıa mınıstri Nurjan Nurjigitov Jambyl oblysyna jumys saparymen baryp, sý sharýashylyǵyn damytý jáne sýarý maýsymyna daıyndyq barysymen tanysty. Mınıstr aldymen elimizde sý salasynyń mamandaryn daıarlaıtyn jetekshi oqý oryndarynyń biri - M.H.Dýlatı atyndaǵy Taraz óńirlik ýnıversıtetine bardy, dep habarlaıdy Almaty-akshamy.kz Sý jáne ırrıgasıa mınıstrligine silteme jasap.
Bilim ordasy byltyr «Qazfosfat» JSHS qoldaýymen Mendeleev atyndaǵy Reseı hımıa-tehnologıalyq ýnıversıtetimen qosdıplomdy bilim berý baǵdarlamasyn iske qosty. Búginde 7 stýdent atalǵan joba boıynsha Reseıde bilim alyp jatyr.
«Qosdıplomdy bilim berý baǵdarlamasy sátti júzege asqanyna qýanyshtymyn. Sý resýrstary jáne ırrıgasıa mınıstrligi bilikti kadr daıarlaý baǵytynda birqatar is-sharalardy júzege asyrdy. Atap aıtqanda, «Bolashaq» bilim berý baǵdarlamasyna «Gıdrogeologıa», «Sý resýrstary» jáne «Sý qaýipsizdigi» sıaqty jańa sý salasynyń baǵdarlamalary engizildi. Qazaqstandyq stýdentter osy jyldan bastap atalǵan baǵyttar boıynsha shetelde bilim ala alady. Sonymen qatar, vedomstvo janynan kásiptik biliktilik jónindegi salalyq keńes quryldy»,- dedi Sý resýrstary jáne ırrıgasıa mınıstri Nurjan Nurjigitov.
Nurjan Nurjigitov oqý korpýstaryn, zerthanalar men jylyjaı keshenin aralap, ýnıversıtet oqytýshylary men stýdentteriniń ǵylymı ázirlemelerimen tanysty.
Máselen, ýnıversıtet ustazdary men stýdentteri maqta qaýyzynan lastanǵan sýdy qaıta tazalaıtyn súzgi ázirlegen. Joba avtorlary ázirlemege qazirdiń ózinde sheteldikter tarapynan qyzyǵýshylyq joǵary ekenin aıtady. Ýnıversıtet qabyrǵasynda jasalǵan taǵy bir mańyzdy ázirleme - sý únemdeıtin tyńaıtqysh. Organıkalyq qaldyqtardyń negizinde jasalǵan tyńaıtqysh topyraqtyń qunarlyǵyn arttyryp, ylǵaldy ýzaq ýaqyt saqtaıdy. Nurjan Nurjigitov mınıstrlik mamandary atalǵan ázirlemelerdi muqıat zerttep, óndiriste paıdalaný múmkindikterin zerdeleıtinin málimdedi.
Jumys sapary aıasynda mınıstr ýnıversıtette ótken sý salasyn damytý taqyrybyna arnalǵan forýmǵa qatysty. Nurjan Nurjigitov mınıstrlik jumysynyń negizgi baǵyttary týraly aıtyp, oqytýshy-professorlar men stýdentterdiń suraqtaryna jaýap berdi.