Sýarý maýsymynyń qalypty ótýin qamtamasyz etý úshin «Qazsýshar» kásiporny elimizdiń 7 óńirinde jalpy uzyndyǵy 2011 shaqyrym bolatyn kanaldardy mehanıkalyq jolmen tazartyp jatyr.
Bul jumystar Almaty, Batys Qazaqstan, Shyǵys Qazaqstan, Jambyl, Qyzylorda, Túrkistan jáne Jetisý oblystarynda júrgizilýde. Búgingi tańda 300 shaqyrymnan astam kanal tazartyldy, dep habarlaıdy aqshamnews.kz.
QR Sý resýrstary jáne ırrıgasıa mınıstrliginiń málimetinshe, kanaldardy tazartý olardyń sý ótkizý múmkindigin jaqsartyp, dıqandardy sýarmaly sýmen turaqty qamtamasyz etý úshin qajet. Bıyl «Qazsýshar» fılıaldary dıqandarmen 12,7 mlrd tekshe metr sý jetkizý úshin 27,8 myńnan astam shart jasasýdy josparlap otyr. Qazirgi tańda 11 700 shart jasaldy. Byltyr sharýa qojalyqtarymen 23 830 shart jasalǵan.
«Byltyr mınıstrlik Qazaqstannyń ońtústik óńirindegi dıqandardy sýarmaly sýmen tolyq qamtamasyz etti. Bıyl da vedomstvo Ortalyq Azıa elderimen kelissózder júrgizdi. Onyń nátıjesi boıynsha 2025 jylǵy sýarý maýsymynda Syrdarıa ózeni arqyly elimizge 3,7 mlrd tekshe metr sý keledi. Shý jáne Talas ózenderimen 600 mln tekshe metrden astam sý jetkiziledi», – dedi sý resýrstary jáne ırrıgasıa vıse-mınıstri Erbolat Ibraıhanov.