Adamzat órkenıetiniń san ǵasyrlyq tarıhy - beıbitshilik pen tatýlyqqa negizdelmegen qoǵamnyń berekesi qashatynyn áldeqashan dáleldegen. Túrli mádenıet pen dinniń, dástúr men salttyń túıisken jerinde ortaq qundylyqtardy saqtaý - kez kelgen memlekettiń turaqty damýy úshin basty shart.
Osy turǵyda Qazaqstan – búkil álemge úlgi bola alatyn dara memleket. Sebebi bul jerde san túrli etnos ókilderi bir shańyraqtyń astynda jarasymdy ǵumyr keship keledi. Olar bir ǵana Otannyń ıgiligi úshin eńbek etip, eldik múdde jolynda jumylǵan.
Kúntizbedegi 1 mamyr – jaı ǵana meıram emes. Bul – kókiregi oıaý, júregi elge toly árbir azamat úshin erekshe rýhanı máni bar taǵylymdy kún. Elimizdegi rýhanı tutastyqtyń, tarıhı sabaqtastyqtyń, mádenı ártúrlilikpen baıytylǵan birtutas qoǵamnyń kórinisi – Táýelsiz eldiń kemel bolmysyn tanytatyn tarıhı beles. Memleket basshysy Qasym-Jomart Kemeluly Toqaev óziniń birqatar sózderinde:
«Qoǵamdaǵy eń basty baılyǵymyz – yntymaǵy jarasqan halyq. Turaqtylyq pen beıbit ómir – eshqandaı baılyqpen ólshenbeıtin ıgilik», – dep atap kórsetken bolatyn. Bul paıym – keleshek urpaq úshin baǵyt-baǵdar bola alatyn tuǵyrly tujyrym. Ulttyń órkendeýi men memlekettiń damýy eń aldymen el ishindegi tatýlyq pen birliktiń beriktigine baılanysty. Keń saharany mekendegen qazaq jurty tarıhtyń talaı taýqymetin basynan keshirse de, eshqashan bótendi jatsynǵan emes. Qýǵyn-súrgin zamandarynda jer aýyp kelgen halyqtarǵa qol ushyn sozyp, baýyryna basqany - búkil ulttyń adamgershilik qasıetiniń bıik úlgisi.
Elimizde tatý-tátti ómir súrip jatyrǵan júzden astam ult pen ulys ókilderiniń árqaısysy óziniń tilin, dilin, dástúrin saqtap qana qoımaı, Qazaqstannyń kemel keleshegine úles qosyp keledi. Minekı, osy biregeı úrdis – Qazaqstan halqy Assambleıasy arqyly júıelenip, jańa deńgeıde, etnostar arasyndaǵy baılanysty nyǵaıtatyn, el ishindegi biregeılikti qalyptastyratyn kúshti qural.
2024 jylǵy sesıada Prezıdentimiz:
«Assambleıa – el birligin nyǵaıtýdyń qýatty tetigi. Ol memlekettik saıasattyń ajyramas bóligi bolyp qala beredi», – dep onyń mańyzyn aıryqsha atap ótti.
Búgingi qoǵam – kópmádenıetti, kóptildi orta. Ortaq taǵdyrdyń ıeleri retinde barsha qazaqstandyqtardyń jaýapkershiligi zor. Sebebi kez kelgen eldiń keleshegi - urpaqtyń boıyna sińirilgen qundylyqtarmen ólshenedi.
Birligi jarasqan el – kez kelgen tarıhı synaqty jeńip shyǵa alady. Iaǵnı, myzǵymas yntymaq pen halyqtar arasyndaǵy tatýlyq – bizdiń eń úlken jetistigimiz. Osy ıgilikti saqtaý, ultjandylyq tanytý – árbir azamattyń paryzy.
Endeshe, álemge úlgi bolarlyq tatýlyqtyń týyn bıikte jelbiretip otyrǵan eldiń bolashaǵy da jarqyn.
Sondyqtan bul mereke – tek kúntizbedegi ataýly kún emes, júrek túkpirindegi maqtanysh, bolashaqqa baǵyttalǵan senim, bıik armannyń kórinisi.