Sý únemdeý tehnologıalaryn engizýdi jedeldetý maqsatynda elimizde kásiporyndardy ónerkásipte sýdy qaıta paıdalaný júıelerine kóshýge yntalandyrý boıynsha is-sharalar qabyldandy.
Jańa Sý kodeksiniń redaksıasynda kásiporyndar úshin bes jyl ishinde sýdy aınalymdy nemese qaıta paıdalaný júıelerine kóshý josparyn ázirleý talap etilgen. Ár oblys boıynsha sýdy qaıta paıdalanýdy ulǵaıtý úshin 2030 jylǵa deıin modeldik josparlar bekitilgen.
2030 jyldyń sońyna deıin ekonomıka salalaryndaǵy sýdy qaıta paıdalaný úlesin 17%-dan 28%-ǵa deıin ulǵaıtý kózdelýde.
Sondaı-aq, turmystyq sý únemdeý boıynsha Ádistemelik nusqaýlyq qabyldanyp, sý tutynýdyń tıimdi ádisteri usynylǵan. Bul nusqaýlyqta krandardaǵy aqaýlardy ýaqytyly jóndeý, aerasıalyq krandardy paıdalaný, eki túımeli sý aǵyzý sısternalaryn ornatý, avtomatty sensorlyq sý aralastyrǵyshtardy qoldaný, kir jýatyn mashınany tolyq júkteme kezinde ǵana iske qosý sıaqty is-sharalar qamtylǵan.
2024 jyly elimizdiń 6 óńirinde aýyzsýdy tarıfteý tártibi qaıta qaraldy. Áleýmettik normalar engizildi: aıyna 3 m³-den artyq sý tutynǵan jaǵdaıda, normadan asyp ketken sý kólemi úshin tarıf joǵarylaıdy. Bul sharalar Aqmola, Aqtóbe, Túrkistan, Ulytaý oblystary men Almaty jáne Shymkent qalalarynda aıyna orta eseppen 1,65 mln tekshe metr sý únemdeýge múmkindik berdi. Áleýmettik normalar engizilgenge deıin aýyzsý tutynýdyń ortasha kólemi 21,1 mln tekshe metr bolǵan bolsa, búgingi tańda bul kórsetkish 19,5 mln tekshe metrge deıin tómendedi.
Sý sharýashylyǵy ınfraqurylymyn jańǵyrtý, sýdy únemdeıtin tehnologıalardy engizý, sýdy esepke alý júıesin sıfrlandyrý jáne halyq pen kásiporyndar arasynda sý únemdeý mádenıetin damytý Qazaqstan halqyna joǵary sapaly sýmen qamtamasyz etýge múmkindik beredi.