QR Sý resýrstary jáne ırrıgasıa mınıstrligi sý únemdeý taqyrybynda balalardyń respýblıkalyq sýret jáne shyǵarmalar baıqaýyn uıymdastyrady.
Baıqaýǵa 5 jastan 16 jasqa deıingi kez kelgen úmitker qatysa alady. «Úzdik sýret» jáne «Úzdik shyǵarma» qos nomınasıasynda 2 jeńimpaz anyqtalady. Barlyǵy 4 qatysýshy júldeger bolady. Úzdik jumystardyń avtorlary baǵaly syılyqtarmen marapattalady, dep habarlaıdy almaty-akshamy.kz.
Baıqaý 2023 jyldyń 25 jeltoqsanyna deıin jalǵasady. Jeńimpazdardy jańa jyl qarsańynda QR Sý resýrstary jáne ırrıgasıa mınıstri Nurjan Nurjigitov marapattaıdy. Úmitkerlerdiń jumystary +77781345811 nomeri boıynsha WhatsApp arqyly, sondaı-aq Instagram-da #sýúnemdeýbaıqaýy heshtegimen qabyldanady.
«Sý resýrstary jáne ırrıgasıa mınıstrliginiń jumys baǵyttarynyń biri - qazaqstandyqtardy sý únemdeý qajettiligi jáne ony tıimdi paıdalaný ádisteri týraly aqparattandyrý. Osy baıqaý arqyly biz adamdardyń, ásirese óskeleń urpaqtyń, oqýshylardyń nazaryn osy máselege aýdarǵymyz keledi. Sý únemdeý aýyz sýmen qamtamasyz etýden bastap aýyl sharýashylyǵyna deıingi kóptegen baǵyttardy qamtıdy, sondyqtan baıqaýǵa qatysýshylardyń shyǵarmashylyǵy úshin shekteý joq. Erekshe kózge túsken qatysýshylardy mınıstrlik basshysy marapattaıdy», - dedi QR Sý resýrstary jáne ırrıgasıa mınıstrliginiń resmı ókili Móldir Ábdýalıeva.