Aldaǵy jyly kúzge salym elordada dúnıejúzilik kóshpendiler oıyny ótedi.
Elge 100-den astam memleketten sportshylar keledi. Baıraqty básekege bizdiń saıypqyrandarymyz da álden daıyndyqty bastap ketti. Olardyń qatarynda sadaqshylarymyz da bar, dep habarlaıdy almaty-akshamy.kz 24.kz-ke silteme jasap.
- Dástúrli sadaq atý qazaqtyń qanyna sińgen óner bolsa da, ózderińiz kórip turǵandaı nysanany kózdep, jebeni dittegen jerińe tıgizý ekiniń biriniń qolynan kele bermeıdi. Ol úshin ótkir kóz ben qýatty qol, sondaı-aq júıkeniń myqtylyǵy kerek.
Qasymhan Qanat dástúrli sadaq atýdan kóshpendiler oıyndarynyń el boıynsha tuńǵysh júldegeri. Byltyr 32 elden qatysqan 95 sportshynyń arasynda ozyq shyǵyp, fınalda óner kórsetken. Biraq aqtyq saıysta joly bolmaı 2 upaı aıyrmashylyǵymen Oǵyz Okshadan jeńilip, kúmis medal oljalady.
Qanat Qasymhan, IV Dúnıejúzilik kóshpendiler oıyndarynyń kúmis júldegeri: - Jalpy ol jaqta bir ǵana nysana boldy. Pýta nysanasy. Al ózimizdiń elde qazaqtyń tól nysanalary qalqan, jamby nysanalary arqyly jarysatyn bolamyz. Endi daıyndyǵymyzdy kóbeıtip jatyrmyz. Bul joly 1 ǵana altyn emes , 2-3 altyn alýǵa nıettimiz.
Qurama bapkeri Dıas Ahmetovtiń aıtýynsha Qasymhannan bólek altynnan úmitti Erbol Tapenov, Aıym Tilepbergen, Farıza Sabyrjan, Maqsat Ábdikerimov sıaqty mergender bar.
Dıas Ahmetov, QR Ulttyq quramasynyń bas bapkeri: - Barlyq daıyndyqtarymyzdy jeńýge tyrysamyz. Jáne bizge kishkene bolsyn kómegi bar bul bizdiń alań. Iaǵnı biz óz erejemizdi jasap jatyrmyz. Ózimizdiń erejemizge sáıkes ótkizetin bolamyz. Jáne bizdiń alań búginnen bastap belgili boldy. Sondyqtan bizde úlken múmkindik bar utýǵa. Iaǵnı biz búginnen bastap, qar erıdi mamyr aıynda sol jerge kúni-túni qonsaqta daıyndalatyn bolamyz.
Respýblıkalyq dástúrli sadaq atý federasıasy 2019 jyldan beri jumys istep keledi. Qazir dástúrli sadaq atý qarqyndy damyp kele jatqan sport túri.
Baqdáýlet Sábıtov, ulttyq jáne at sporty túrleri ortalyǵynyń dırektory: - Kóshpendiler oıynyna keletin bolsaq, kelesi jylǵa biz Qazaqstan chempıonatyn ótkizip qoıdyq.Sonyń nátıjesinde ulttyq qurama jasaqtalady.Ulttyq quramanyń tizimi 20 jeltoqsanǵa deıin bekitilýi tıis. Jalpy 11 sportshy qatystyrsaq degen jospar bar. Jalpy men ózim mekeme basshysy retinde talap qoıyp otyrmyn. Keminde 2 altyn alý kerek degen. Ary qaraı sportshylar ózderi kóredi. Biz 2 altyn alýǵa barlyq jaǵdaıdy jasaımyz. Daıyndyǵyna, sadaǵyna, oǵyna, ekıpırovkasyna. Qajet bolǵan jaǵdaıda túrli dárý-dármekterine búkiline jaǵdaı jasaımyz.
5-dúnıejúzilik kóshpendiler oıyny 8-15 qyrkúıek aralyǵynda elordamyzda ótedi. 100 den astam memleketten 4000-ǵa jýyq sportshy keledi dep josparlanǵan. Olar sporttyń 20 túrinen baq synaıdy. Solardyń ishindegi dástúrli sadaq atý ózgelerden bási bıik, júldegi basty úmitti sporttyń túri. Altynnyń jolynda sportshylar da, bapkerler de baryn salyp jatyr. Oǵan biz de kýámiz, siz de kýásiz.