30 qańtardan bastap azamattyq qorǵaý bólimsheleriniń jumysyn kúsheıtý tapsyryldy.
Premer-Mınıstr Álıhan Smaıylovtyń tóraǵalyǵymen Úkimettiń sıfrlyq keńsesinde ótken keńeste sý tasqyny kezeńine daıyndyq boıynsha jedel sharalar qabyldaý máselesi qaraldy, dep habarlaıdy Almaty-akshamy.kz Úkimettiń telegram kanalyna silteme jasap.
Tótenshe jaǵdaılar mınıstri Iýrıı Ilın «Qazgıdromettiń» boljamy boıynsha respýblıkanyń ońtústigi men ońtústik-shyǵysynda 31 qańtar men 4 aqpan aralyǵynda qar aralasqan qatty jaýyn-shashyn bolyp, temperatýra kóteriletinin habarlady. Onyń aıtýynsha, qalyń qardyń erýinen sý jınalyp, bul muzdyń kúrt erýi men ózenderde sý deńgeıiniń kóterilýine ákep soǵýy múmkin.
Osyǵan baılanysty Almaty, Túrkistan, Qyzylorda, Jambyl jáne Jetisý oblystaryna 30 qańtardan bastap azamattyq qorǵaý bólimsheleriniń jumysyn kúsheıtý tapsyryldy.
Premer-Mınıstr óńirlerdiń ákimdikteri TJM-men birlesip, qajetti shuǵyl sharalardyń barlyǵyn qabyldaýy qajet ekenin atap ótti.
«Qazir bizge sý tasqynyna daıyndyq sharalaryn kúsheıtý kerek. Aýa raıynyń kúrt jylynýynan tasqyn qaýpi týyndaǵanyn kórip otyrmyz. Bul baǵytta tıisti is-sharalardy jedel úılestirý úshin Premer-Mınıstrdiń birinshi orynbasary Roman Sklárdyń jetekshiligimen arnaıy Úkimettik komısıa jumysyn bastaıdy», - dedi Álıhan Smaıylov.