Kólik urlaǵan jigit «jábirlenýshiniń óz uly tapsyrys bergenin» aıtty.
Almatyda urlanǵan kólik Shymkentten tabyldy. Kólikti urlaǵan adam osylaı isteýge «tapsyrys túskenin» aıtqan, - dep habarlaıdy Almaty-akshamy.kz
Almaty polısıa departamentiniń málimetinshe, «Húndaı» kóliginiń urlanǵany týraly ıesi polısıaǵa habarlaǵan. Áıeldiń aıtýynsha, belgisiz bireý onyń «Daraboz» shaǵynaýdanyndaǵy úılerdiń biriniń aýlasynda turǵan sheteldik kóligin urlap ketken.
«Osy qylmysty ashý maqsatynda qalalyq krımınaldyq polısıa jáne Alataý aýdandyq polısıa basqarmasynyń qyzmetkerleriniń arasynan jedel tergeý toby quryldy. Biz beınebaqylaý júıeleriniń múmkindikterin belsendi túrde paıdalandyq, onyń kómegimen, eń aldymen, kólikti urlaǵan adamnyń qozǵalý baǵyty men nómirdi aýystyrý deregi anyqtaldy. Kúdik týdyrmas úshin qaskóı urlanǵan kólikke dál sondaı «Húndaı» kóliginiń nómirlerin ornatqan. Jedel izdestirý sharalarynyń tizbegi jedel ýákilderdi Shymkent qalasyna alyp keldi. Kúdikti sol jerde ustaldy», - dedi Almaty polısıa departamenti bastyǵynyń orynbasary, polısıa polkovnıgi Dıdar Ahanov.
Alaıda ustalǵan adam - 2000 jyly týǵan K esimdi azamat, jábirlenýshiniń uly sheteldik kólikti urlaýǵa «tapsyrys bergenin» aıtqan. Ekeýi dos bolyp shyqty.
«Biz naqty mán-jaıdy, qylmystyń sebebin anyqtaımyz. «Tapsyrys týraly» nusqa da muqıat tekserilip jatyr. Jastar saqtandyrý tólemderin alý úshin urlyqty josparlaǵan bolýy da múmkin. Sotqa deıingi tergeý jalǵasyp jatyr», - dedi polkovnık Ahanov.