Qala turǵyndary úshin qalanyń bas gazetterin tegin taratý aksıasyn bastady.
“Alatay aqparat” medıaholdıngi ótken aptadan bastap qala turǵyndary úshin qalanyń bas gazetterin tegin taratý aksıasyn bastady. Búgingi shara Áýezov aýdanynyń Halyqqa qyzmet kórsetý ortalyǵy men №1 qalalyq klınıkalyq aýrýhanasynda uıymdastyryldy, dep habarlaıdy Almaty-akshamy.kz.
- Anam “Almaty aqshamy” gazetiniń birde-bir nómirin jibermeı oqıdy. Eldegi, ásirese, qaladaǵy sońǵy jańalyqtardy osy gazetten oqyp, bizge aıtyp otyrady, - deıdi Gúljan esimdi Áýezov aýdanynyń turǵyny.
Kúlásh, zeınetker:
- Gazetti úı jaqtaǵy dúńgirshekten arnaıy baryp satyp alamyn. Barýǵa múmkindik bolmaı qalsa, satýshy qyzǵa habarlasyp: «maǵan gazettiń jańa nómirin alyp qoı» dep aıtamyn. Áıtpese, dúńgirshekke gazet kelgen boıda birden ótip ketedi. Óte unaıdy, jaqsy gazet. Ózimizdiń ana tilimizde eldegi jańalyqtar men jaqsy jaǵymdy maqalalardy oqyp turamyn. Gazet shyqqaly turaqty oqyrmanymyn. Qazaq tilinde osy gazetti oqımyn. Jaqsy jańalyqtardy jıi jazsyn degen tilegim bar.
- “ Almaty aqshamy”, “Vechernıı almaty” gazetteri - meniń jastyq shaǵymnan kele jatqan basylymdar. Qazir biz barlyq aqparatty áleýmettik jeliler arqyly oqımyz. Biraq gazet qaladaǵy aqparattyń qaınar kózi bolyp qala beredi. Keıde biz gazettegi aqparatty, oqylymdy maqalalardy áleýmettik jeliden kórmeımiz. Egde jastaǵy adamdar uıaly telefon, áleýmettik jelini paıdalana bermeıdi, unatpaıdy. Olar gazet-jýrnaldardy kóbirek oqýǵa daǵdylanǵan. Gazet betterinde Almaty qalasynyń ómiri týraly oń pikirler men jaqsy jańalyqtar kóp bolsyn. Jaqsylyqtyń jarshysyna aınalsyn, - dedi Smart Health University City senimgerlik basqarýyndaǵy Almaty qalasynyń №1 qalalyq klınıkalyq aýrýhanasynyń basqarma tóraǵasy Ernest Qalıev.
Ustaz-zeınetker Asylaıym Temiralıeva gazettiń bizdiń qoǵamǵa óte qajet ekenin atap ótti.
- Gazet arqyly jańalyqtardan habardar bolyp otyramyz. Qarapaıym halyqtyń jaǵdaıy, aýyldar men shetki aımaqtardyń ómiri týraly jazý qajet dep sanaımyn. Men aýa raıy, kıno, saıasat t.b. týraly jańalyqtardy oqımyn. Basylymdardan bas tartpaý kerek – bul mádenıet pen ıntellektti qalyptastyrady, - dedi 85 jastaǵy Asylaıym Temiralıeva.
