Almatylyq qutqarýshylar kóktemgi sý tasqynyna daıyndyq ústinde, dep habarlaıdy Almaty-akshamy.kz Óńirlik komýnıkasıalar qyzmetine silteme jasap.
Almaty qalasy TJD Tótenshe jaǵdaılardyń aldyn alý basqarmasynyń basshysy Almat Janyspaev barlyq tehnıkanyń jaramdy ekenin, jeke quramnyń bolýy múmkin sý tasqyny kezinde jedel jumysqa daıyn ekenin aıtty.
Qutqarýshylar aýa raıynyń tosyn minezin eskerip, «Qazgıdromet» meteorologtarymen jáne «Kazseldenqorǵaý» mamandarymen únemi baılanysta.
Azamattyq qorǵaý podpolkovnıgi Almat Janyspaev bıylǵy 16 qańtarda Almaty qalasy ákiminiń tóraǵalyǵymen tabıǵı jáne tehnogendik sıpattaǵy tótenshe jaǵdaılardyń aldyn alý jáne sý tasqyny kezeńine daıyndyq jáne Almaty qalasyndaǵy gıdrotehnıkalyq qurylystardyń jaǵdaıy máseleleri boıynsha komısıa ótkenin aıtty. Jıyn qorytyndysy boıynsha qala ákimi birqatar tapsyrmalar berdi.
«Qazgıdromet» RMK Almaty qalasy boıynsha fılıalynyń gıdrometeorologıalyq monıtorıńiniń málimetteri boıynsha 2022 jyldyń 1 qazanynan bastap jaýǵan jaýyn-shashyn mólsheri 226 mm bolatyn normadan sál asqan - 260 mm, bul normadan 13 paıyzǵa artyq, Almaty qalasynda topyraqtyń qatýy 37 mm normada 44 sm quraıdy (bul jaǵdaıda orta taýly aımaqtarda qatý 30 sm-den aspaıdy, bul qalypty shekterde). 31 qańtardaǵy qar jamylǵysynyń bıiktigi 35 sm, ıaǵnı qalypty jaǵdaıda (maksımaldy mánder 2018-2019 jyldary baıqalǵan – 100 sm-den astam), ylǵal qory 57 mm, norma boıynsha 76 mm ( -25%).
Júıeli monıtorıńti uıymdastyrý jáne sý tasqynynyń saldaryn aldyn alý jáne sý basý zardaptaryn joıý sharalaryn ázirleý maqsatynda múddeli memlekettik organdarmen birlesip komısıalyq zertteý júrgizilip, onyń barysynda sý basý qaýpi bar 102 aýmaq anyqtaldy.
«Búgingi tańda 62 mekenjaıda kanal jelilerin qaıta jańartý jáne salý jumystary aıaqtaldy, bul 49 ýchaskedegi qaýip-qaterdi joıýǵa múmkindik berdi. Qazirgi ýaqytta 7 ýchaskede qurylys-montaj jumystary júrgizilýde, olar osy jyldyń naýryz aıynyń sońyna deıin aıaqtalady», - dedi ÓKQ baıandamashysy.
Almat Janyspaev 2021 jyly «Sý tasqynyna qarsy 2021-2023 jyldarǵa arnalǵan is-sharalar kesheni» respýblıkalyq jol kartasy bekitilgenin, oǵan sáıkes, Almatyda 4 is-shara qarastyrylǵanyn eske saldy. Búgingi kúni Kishi Almaty, Tiksaı, Esentaı jáne Jarbulaq ózenderi arnalarynyń jekelegen ýchaskelerin qaıta jańǵyrtý jumystary aıaqtaldy.
Aıta keterligi, Almaty qalasynda Balqash-Alakól baseındik ınspeksıasynyń baqylaýynda 39 gıdrotehnıkalyq qurylys bar. TJD men «Kazseldenqorǵaý» mekemesiniń qyzmetkerleri kún saıyn qalanyń barlyq aýdandaryndaǵy sý qoımalaryna, ózen arnalaryna baqylaý júrgizedi. Aqsaı, Úlken jáne Kishi Almaty ózenderiniń boıynda jyljymaly posttar ornatylǵan.
Qazirgi tańda aýdan ákimdikteri aryqtar men ózen arnalaryn qar men muzdan tazartý jumystaryn qarqyndy júrgizip jatyr. Aryq júıesiniń jalpy uzyndyǵy 1300 shaqyrymnan asady. Búgingi tańda 460 shaqyrymnan astam jer tazartyldy.
«2023 jylǵy sý tasqyny kezeńinde Almaty qalasy turǵyndarynyń qaýipsizdigin qamtamasyz etý maqsatynda Tótenshe jaǵdaılar mınıstrliginiń aýmaqtyq bólimsheleri men Almaty qalasynyń azamattyq qorǵaý qyzmetteriniń kúshteri men quraldarynyń jalpy sany 1609 adam bar, ártúrli maqsattaǵy 618 birlik tehnıka, 85 motopompa, sonymen qatar 99 birlik avtonomdy elektr stansıalary bar», - dep tolyqtyrdy Almaty qalasy Tótenshe jaǵdaılar departamentiniń ókili.
Qalalyq azamattyq qorǵaý qyzmetterine 13 700 qap pen 590 tonna ınertti materıal satyp alyndy. Naýryz aıynda qalada «Kóktem-2023» respýblıkalyq komandalyq-shtabtyq oqý-jattyǵýy ótedi, osy oqý-jattyǵýlar aıasynda qalanyń ózender men arna júıelerin qar men qoqystan tazartý boıynsha qosymsha jumystar júrgizilmek. Jalpy, aldaǵy sý tasqyny kezeńine daıyndyq basqarmanyń erekshe baqylaýynda.
Almaty qalasy Tótenshe jaǵdaılar departamenti Tótenshe jaǵdaılardyń aldyn alý basqarmasynyń basshysy Almat Janyspaev azamattardy «Dármen» mobıldi qosymshasy arqyly kelip túsetin daýyldy eskertýler, aýa raıy boljamy, taýdaǵy qar kóshkinin aldyn alý jáne t.b. aqparattardy der kezinde alýǵa shaqyrdy.