İshki ister mınıstrligi sý tasqyny týraly jalǵan aqparat taratqan azamattar jaýapkershilikke tartylatynyn eske saldy.
İİM resmı ókili Shyńǵys Alekeshevtiń aıtýynsha, kúrdeli sý tasqyny jaǵdaıyna baılanysty TJ rejımi jarıalanǵan sátten bastap jalǵan aqparat taratqany úshin Mańǵystaý jáne Qostanaı oblystarynda eki qylmystyq is qozǵalǵan. Eki fakt boıynsha psıhologıalyq-fılologıalyq jáne fonetıkalyq saraptama júrgizýge qaýly shyǵaryldy, dep habarlaıdy Almaty-akshamy.kz.
Ákimshilik quqyq buzýshylyqtar boıynsha 13 fakt anyqtaldy.
Máselen, 14 sáýirde Atyraý oblysynyń turǵyny WhatsApp-ta óńirdegi sý tasqyny jaǵdaıy nasharlap, Atyraý oblysyn sý basý qaýpi tónip turǵany týraly aýdıojazba taratyp, nátıjesinde ÁQBtK-niń 456-2-baby 3-bóligi (jalǵan aqparat taratý) boıynsha ákimshilik jaýapkershilikke tartyldy. Aıyppul 10 AEK – 36 920 teńgeni qurady.
Sondaı-aq 14 sáýirde Petropavl turǵyny TikTok-ta Podgordyń sý basqan aýdanynda qasqyrlar men qabandar paıda boldy degen jalǵan beınejazba jarıalady. Ol ákimshilik jaýapkershilikke tartylyp, 10 AEK mólsherinde aıyppul tóledi.
15 sáýirde Aqtaý turǵyny Mahambet aýdanynyń Mahambet aýylyna 300-ge jýyq áskerı qyzmetshi kelip, jergilikti turǵyndar salǵan bógetti qıratýǵa tyrysqany týraly habarlama taratty. Bul úshin ákimshilik jaýapkershilikke tartylyp, 20 AEK – 73 840 teńge kóleminde aıyppul salyndy.
16 sáýirde Petropavldyń taǵy bir turǵyny jelide Soltústik Qazaqstan oblysynda sý tasqyny kezinde eki balanyń qaıtys bolǵany týraly beınerolık jarıalady, bul aqparat jalǵan bolyp shyqty. Feık habar taratýshy 20 AEK mólsherinde aıyppul tóledi.
20 sáýirde Petropavl turǵyny WhatsApp-qa evakýasıalyq ortalyqtar ornalasqan mektepterdiń qyzmetkerleri gýmanıtarlyq kómekti ózderine alyp jatqany týraly dybystyq habarlama júktedi. Oǵan kórineý jalǵan aqparat taratqany úshin 10 AEK aıyppul salyndy.
Mundaı jaǵdaı 21 sáýirde Petropavlda da tirkeldi. Jergilikti turǵyn TikTok-ta jalǵan aqparat taratyp, eriktiniń gýmanıtarlyq kómekti urlaǵany týraly beınejazba jarıalady. Bul úshin oǵan 20 AEK kóleminde aıyppul salyndy.
22 sáýirde Petropavldyń taǵy bir turǵyny Instagram-da Sergeev sý qoımasynyń tolyp ketýine qatysty jalǵan aqparat taratyp, istegeni úshin 10 AEK mólsherinde aıyppul tóledi.