6 mamyrda negizgi UBT-ǵa ótinishterdi qabyldaý bastalady. Ol 14 mamyrǵa deıin bolady.
Testileýdiń ózi 16 mamyrda bastalyp, 5 shildege deıin jalǵasady. Degenmen, tótenshe jaǵdaı rejımi jarıalanǵan 6 óńirde (Aqmola, Aqtóbe, Atyraý, Batys Qazaqstan, Qostanaı, Soltústik Qazaqstan oblystary) tirkelý ýaqyty uzartylady, dep habarlaıdy almaty-akshamy.kz.
Ulttyq testileý ortalyǵynyń habarlaýynsha, UBT 6-20 mamyr men 25 mamyr-12 shilde aralyǵynda ótkiziledi.
Ǵylym jáne joǵary bilim mınıstrliginiń sheshimi boıynsha bıyl talapkerler negizgi UBT-ny eki ret tapsyryp, eń úzdik nátıjemen grant konkýrsyna qatysa alady.
UBT-ǵa qatysý úshin Ulttyq testileý ortalyǵynyń app.testcenter.kz saıty nemese UTO qosymshasy arqyly tirkelýge bolady. Talapkerler testileý kúnin, ýaqytyn jáne pýnktin ózderi tańdaıdy. Bul rette olar eki múmkindik úshin beıindik pánderdiń bir ǵana kombınasıasyn belgileıdi.
Talapkerlerdiń negizgi UBT-ǵa daıyndyǵyn jaqsartý maqsatynda osyǵan deıin ár pán boıynsha jeke taqyryptyq taldaý engizildi. Iaǵnı, ár UBT-dan keıin (qańtar, naýryz) túlekterge jeke taqyryptar boıynsha bilimderin arttyrý usynylady. Sonymen qatar, birinshi múmkindikti tapsyrǵannan keıin olar ekinshi múmkindikke deıin daıyndyqtaryn jaqsarta alady . Odan bólek, onlaın baıqaý synaqtary iske qosylǵan. Bilim berý ortalyqtarymen birigip uıymdastyrylǵan tegin onlaın sabaqtar jalǵasýda. Al oqý jylynyń basynda UTO saıtynda test tapsyrmalary qurastyrylǵan oqýlyqtar tizimi men test jospary; «Qazaqstan tarıhy» jáne «Dúnıejúzi tarıhy» pánderi boıynsha 100 tarıhı data tizimi; «Informatıka» páninen termınder tizimi; «Qazaq ádebıeti» jáne «Orys ádebıeti» boıynsha ádebı shyǵarmalar tizimi jarıalandy.
Testileý formatynda ózgeris joq. 2024 jylǵy talapkerler úsh mindetti jáne tańdaý boıynsha eki pánnen test tapsyrady. «Oqý saýattylyǵy» men «Matematıkalyq saýattylyq» mindetti pánderinen tapsyrmalar sany 5 suraqqa qysqardy. Bul beıindik pánder boıynsha suraqtar sanyn 40-qa deıin arttyrýǵa múmkindik berdi. Sonymen qatar beıindik pánderde berilgen tizimnen sáıkestikti anyqtaýǵa arnalǵan 5 tapsyrma qosyldy, – delingen habarlamada.
Ortalyqtyń málimetine qaraǵanda, osylaısha, UBT tapsyrmalar sany ózgerissiz qalady. Jalpy 120 suraq. Onyń ishinde «Qazaqstan tarıhynan» 20 tapsyrma, «Oqý saýattylyǵynan» 10 tapsyrma, «Matematıkalyq saýattylyqtan» 10 tapsyrma jáne eki beıindik pán boıynsha 40 tapsyrma. Joǵary bal – 140, ol da ózgerissiz qaldy.
Testileýdiń jalpy ýaqyty – 4 saǵat (240 mınýt). Sonymen qatar erekshe bilim berý qajettilikteri bar balalarǵa qosymsha 40 mınýt ýaqyty saqtalady.
Akademıalyq adaldyqty qamtamasyz etý maqsatynda test nusqalary tańbalanǵanyn atap ótken jón. Iaǵnı, UBT-ǵa qatysýshylardyń árqaısysynyń jeke test nusqasy bolady. Sonymen qatar, kálkýlátor, Hımıalyq elementterdiń perıodtyq júıesi men tuzdardyń erigishtik kestesi kompúter ekranynda qoljetimdi etiledi. Talapkerlerdiń pikiri men qalaýyn eskere otyryp, olarǵa kestelerdiń qaǵaz nusqasy beriledi.
Test tapsyrýshylar testileý aıaqtalǵannan keıin 30 mınýt ishinde apelásıaǵa ótinish bere alady. Sertıfıkat appelásıalyq komısıanyń sheshiminen keıin talapkerdiń jeke kabınetinde qoljetimdi bolady.
Shekti bal ózgergen joq: «Quqyq» jáne «Pedagogıkalyq ǵylymdar» bilim berý salalary úshin keminde 75 bal, «Densaýlyq saqtaý jáne áleýmettik qamtamasyz etý (medısına)» keminde 70 bal, «Aýyl sharýashylyǵy jáne bıoresýrstar», «Veterınarıa» keminde 60 bal (ulttyq joo úshin); ulttyq joǵary oqý oryndaryna túsý úshin keminde 65 bal, basqa joǵary oqý oryndaryna keminde 50 bal jınaý kerek.
Testileýge kirgizý kezinde qol jáne ramalyq metal izdegishter paıdalanylady. Bul talapkerlerdiń qaýipsizdigin qamtamasyz etip, erejelerdi buzý men tyıym salynǵan zattardy (uıaly telefon, shpargalka jáne t.b.) alyp ótýdiń aldyn alý úshin qajet.
Testileý kezinde aýdıtorıanyń jáne beınebaqylaýdyń aýdanyna baılanysty ruqsat etilgen magnıttik tolqyndar sheginde utqyr jáne radıoelektrondyq baılanys sıgnaldaryn basatyn qurylǵylar qoldanylady.
2024 jylǵy UBT aıaqtalǵannan keıin kúntizbelik jyldyń 31 qazanyna deıin testileýdiń beınejazbalaryna taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda túsýshiniń UBT nátıjeleri joıylady.