İshki aýdıt qorytyndysyna saı Jambyl oblysy boıynsha «Qazsýshar» fılıalynyń dırektory men Asa óndiristik aımaǵynyń basshysy qyzmetinen bosatyldy.
Budan bólek, fılıal dırektorynyń orynbasary men Qordaı, Baızaq, Merki óndiristik aımaqtarynyń basshylary qatań sógis túrinde tártiptik jaýapkershilikke tartyldy, dep habarlaıdy aqshamnews.kz Sý resýrstary jáne ırrıgasıa mınıstrligine silteme jasap.
Eske salsaq, osyǵan deıin Sý resýrstary jáne ırrıgasıa mınıstri Nurjan Nurjigitovtiń tapsyrmasy boıynsha mınıstrliktiń İshki aýdıt departamenti Jambyl oblysy boıynsha «Qazsýshar» fılıalyna tekseris júrgizgen bolatyn. Anyqtalǵan quqyq buzýshylyqtardy odan ári qaraý úshin aýdıt materıaldary QR Bas prokýratýrasyna jiberildi.
Bul jumystar sýdyń «kóleńkeli» naryǵymen, sý salasyndaǵy zańsyz árekettermen kúresý jáne tártip pen ashyqtyqty qamtamasyz etý úshin júzege asyrylýda. Aıta ketý kerek, mekemeniń ózge aımaqtardaǵy fılıaldarynda da tekseris júrgiziledi.
Mınıstrlik mamandary Jambyl oblysynda júrgizgen aýdıt barysynda sý resýrstaryn zańsyz paıdalanýdyń 10-ǵa jýyq faktisin, sondaı-aq sharýalarmen sýarmaly sý berý kelisimsharttaryn jasaý barysynda zań buzýshylyqtarǵa jol bergenin anyqtaǵan bolatyn.
«Sý resýrstaryn zańsyz paıdalaný faktilerimen kúres jalǵasady. Ol úshin meniń tapsyrmam boıynsha mınıstrlik janynan arnaıy komısıa qurylyp, «Qazsýshar» fılıaldary men baseındik ınspeksıalarǵa tekseris júrgizedi. Zańsyz áreketterge mindetti túrde tosqaýyl qoıylyp, quqyq buzýshylar men laýazymdy qyzmetkerler jaýapkershilikke tartylady. Biz sý resýrstaryn paıdalanýdy baqylaýdy kúsheıtemiz», - dedi Sý resýrstary jáne ırrıgasıa mınıstrliginiń apparat keńesinde vedomstvo basshysy Nurjan Nurjigitov.