Elimizdegi eń iri Kitap Fest Almaty kitap festıvali onjyldyq mereıtoıyn atap ótýde
Mádenı astananyń kitapsúıer qaýymy eki kún ishinde Kitap Fest Almaty alańynda segiz myńnan astam kitap satyp aldy. Eki kúnge arnalǵan baǵdarlama qala kúnin merekeleý aıasynda ázirlendi jáne báriniń qaladaǵy súıikti orny – Arbatta ótti, dep habarlaıdy aqshamnews.kz
Atap ótetini, eń iri kitap festıvali bıyl óziniń onjyldyq mereıtoıyn atap ótýde. Osy ýaqyt aralyǵynda bul joba kitapqa degen súıispenshiliktiń sımvolyna aınaldy jáne ózin kitap oqý mádenıetin ilgeriletý úshin biregeı platforma retinde kórsete otyryp, elimizdegi kitap mádenıetin damytýdaǵy mańyzdy kezeń boldy.
«Kitap fest-tiń basqa festıválderden aıyrmashylyǵy nede? Birinshiden, bul Qazaqstandaǵy jalǵyz kitap festıvali. Ekinshiden, bul jaı ǵana kitap jármeńkesi emes. Biz kitap oqý mádenıeti men ony oqýǵa degen súıispenshilikti nasıhattaımyz. Biz kitap oqýdy tanymal jáne óte qajetti ete túspekshimiz. Sol úshin de kitapsúıer qaýymdy, avtorlardy jáne ádebıet salasyndaǵy jetekshi sarapshylardyń basyn qostyq», - dep atap ótti Kitap Fest Almaty festıvaliniń negizin qalaýshy Juldyz Omarbek.
Festıvál qatysýshylary eki kún ishinde kóptegen ınteraktıvti alańdar: qazaqstandyq jazýshylarmen kezdesýler, balalarǵa arnalǵan qyzyqty sheberlik synyptary, kórmeler men zıatkerlik baıqaýlar arqyly kitaptar álemine enip úlgerdi. Festıvál barysynda 70-ten astam kitap dúkenderi men baspalar qala turǵyndaryna barlyq talǵamǵa saı kitaptar usyndy. Sondaı-aq, joba qatysýshylary belgili tulǵalarmen kezdesýler ótkizip, erkin formatta qazirgi ádebıettegi trendter týraly áńgimelesti.
«Bizdiń baspa jobaǵa alǵash ret qatysyp otyr. Bizdiń baıqaýymyzsha, kórkem ádebıet, balalar ádebıeti, nonfıks janry óte jaqsy damyǵan. Alaıda, meniń oıymsha, áli de ǵylymı ádebıetter az. Sondyqtan biz osy baǵytta damý qajet dep sheshtik. Kelgen qonaqtar men oqyrmandardyń shynaıy kózqarasy men qyzyǵýshylyǵy bizdi beı-jaı qaldyra almaıdy. Jyl saıyn osy festıválge qatysamyz degen úmittemiz», - dep bólisti baspalardyń biriniń dırektory Sadyq Sherimbek.
Kitap Fest Almaty kitap oqý mádenıeti jaı ǵana hobbı emes, tárbıe men bilim berýdiń mańyzdy elementi ekenin taǵy da kórsetti. Festıvál tek mádenı mereke ǵana emes, sonymen qatar bilimdi jáne kitam oqıtyn qoǵam qurýǵa baǵyttalǵan mańyzdy qadam boldy. Festıválge kelgen kóptegen adamdar mundaı sharalardyń kitapqa degen qyzyǵýshylyqtyń artýyna yqpal etetinin jáne jańa jetistikterge shabyttandyratynyn aıtty.